Vawiin chawhnu khan Baptist Higher Secondary School (BHSS), Serkawn, Lungleiah District Information and Public Relations Officer (DIPRO) Pi C. Lalremruati chuan Mizoram Youth Commission (MYC) buatsaih zirlaite tana Engineering leh Medical College entrance tura inpuahchahna class MYC & ALS Online IIT-JEE & NEET Coaching a hawng.  

Hawnna programme Pu Lalrinmawia, Principal BHSS kaihhruaiah hian Pi C.Lalremruati chuan Online Coaching Class hawn a ni chu Mizoram chhimlam mipuite, a bik takin thalaite tan malsawmna ropui tak a ni tiin he Centre din tura thahnemngai taka hma la tu MYC Chairman Pu Joseph Lalhimpuia chungah lawmthu a sawi a. India rama Coaching Centre tha berte zing ami Alternative Learning System (ALS) hnuaiah Mizo thalaiten an zir ve thei tur chu hmasawnna rahbi pawimawh tak a ni tiin zirlaite chu taima tak leh tum tak takna rilru nen inpuahchah turin a fuih a. Coaching Center hlawhtlinna chu zirlaite ah a innghat thui hle a ni tiin zirlaite chu class kal loh mai mai ching lo turin a chah bawk.

He hunah hian Pu Lalmuanzuala, Youth Commission Officer, Southern Mizoram Zone chuan Technical Report a pe a. MYC & ALS Online IIT-JEE & NEET Coaching hnuaiah hian Lungleiah Centre pahnih awmin Baptist Higher Secondary School (BHSS), Serkawn ah Classroom pathum leh Government Higher Secondary School-ah Classroom pahnih a awm a. Tun dinhmunah zirlai 130 an in register tawh a ni. He Coaching Centre ah hian Very-small-aperture terminal (VSAT) Satellite C-Band hmangin Alternative Learning Systems (ALS) Delhi Online class neih thin a ni ang. MYC leh ALS hmalaknain IIT-JEE leh NEET Coaching Class kal duh zirlaite tan July thla khan Scholarship Exam buatsaih tawh niin Lunglei District zirlai 164 ten scholarship hi an hmu dawn a ni. IIT-JEE/NEET online coaching hi Aizawl-ah school pathum St. Paul’s HSS, Govt. Mizo HSS leh Govt. Republic HSS ah te kalpui mek a ni bawk.