No.7606/2020-2021

Nimin khan National Bank for Agriculture and Rural Development (NABARD) buatsaihin DRDA Conference Hall, Lungleiah Sensitization Workshop on Rural Infrastructure Development Fund (RIDF) for State Government Officials te tan  neih ani.

He workshop hi Pu Evan. T. Munsong, District Development Manager (NABARD) Lunglei in kaihruaiin Pu S.N. Mallick, General Manager (NABARD) chuan Mizoram sorkar leh  NABARD te chuan thawhhona tha tak hnuaiah Mizoram chhungah hmasawnna hna engemawzat thawh mek anih thu a sawi a. NABARD kaltlangin Mizoram Sorkar Department hrang hrang Agriculture, Horticulture, AH & Vety. PWD leh a dang ten  thingtlang hmasawnna ruhrel atana sum pechhuak leh hmanna kawngah hmalak thin a ni a . Project siam dana zira sum pekchhuah thin a ni a ti bawk.   Mizoram hmun hrang hrangah thlai leh thei dah thatna tur warehouse te siam a ni a, khaw hrang hrang ah market shed sak ani bawk. Inkalpawhna tha neih nan nasa taka hmalak niin hriselna leh zirna ah pawh hmalak a ni, ti. RIDF hi Mizoram ah a huam zau thei ang bera hman anih  theih nan Line Department-te nena hmalak anih thu a sawi bawk a ni. Hmasawnna ruhrel atana project siam kawngah harsatna nei te chuan DDM, Lunglei emaw GM, Aizawl ah zawt fiah turin a chah ani.

Pu Evan.T.Munsong, DDM, Lunglei in NABARD hnathawh dan sawiin Rural Infrastructure Development Fund guidelines angin project atana sum sanction leh  hman dan bakah Line Department hrang hrangte nena hmalak dan tur sawiho a ngaih thu a sawi a. RIDF hi DPR siam hmanga  fund sanction thin a ni a, NABARD kaltlanga pawisa puk hi kumkhat ah 2.7% chauh in a pung a, Fund Sanction tute hi Ministry hrang hrang atanga member ruat te an ni. Mizoram in 15th, February 2021 thlenga project 522 atana RIDF sum sanction chu Rs 1406.35 crore a ni. Mizoram tan kum 2020-2021 chhung a  NABARD sum Rs 160 Cr.hman tura  Sanction/allocate anih thu a sawi bawk. Lunglei District chhunga NABARD sum hmanga project siam thenkhat te chu Lungpuizawl ah AH&VETY, Dept. Building, Rural Animal Health Centre, Rabung te leh Hnahthial atanga Thingsai, Zote(S) atanga Chhipphir kawng siam te an ni.

Pu O.P.Mounglang, Asst. General Manager, NABARD pawhin thusawiin Mizoram ah NABARD kaltlangin kum 20 chuang hmasawnna hna thawh anih thu sawiin project hrang hrang thingtlang inkalpawhna,  kawng thar laih,tui thianghlim pek, Leidawh, Solar Power Plant bun, thingtlang zirna tih hmasawn leh  thingtlang hriselna te ngai pawimawh bakah hmasawn ruhrel tam tak tan DPR  a hlawk thei ang ber a siam dantur te a tarlanga ani.

RIDF Workshop hi hlawhtling taka neih niin zawhna leh chhanna hun hman chhunzawm a ni.