Vawiin chawhnu khan ram chhung hmun dangte rualin National Deworming Day 2017 chu Lunglei District-ah pawh Baptist Higher Secondary School, Tucker Hall-ah hman a ni a. Lunglei DC Pi Lalzarmawii, IAS chuan khuallian niin a hmanpui.  

He Day hmanna Lunglei District Chief Medical Officer (CMO), Dr VLMS Dawngliana kaihruai ah hian Dr. Lalrinthangi, SMO, Lunglei chuan thu sawiin National Deworming Day hman a nih chhan leh thiltum tlangpuite zirlai leh official kalkhawmte hnenah a sawifiah a. He Ni hi kum 2015 atang khan hman tan niin, sawrkar laipui Ministry of Health and Family Welfare duan chhuah a ni, a ti a. Rulhut pai hian rilru chak lohna, thisen tlakchham, vitamin leh iron tlakchham leh thluak lam hrisel lohna te a thlen theih avangin National Deworming Day chu sawrkarin a ngai pawimawh em em a, thangtharte ram leh hnam tana an tangkai chhoh theih nan hriselna an neih a pawimawh hmasa ber a ni, a ti. 

Khuallian Lunglei DC, Pi Lalzarmawii, IAS pawhin thu sawiin zirlai kalkhawmte chu an hriselna lam ngai pawimawh reng turin a chah a. Rulhut pai chuan natna khirh tak te a thlen theih avangin faina leh thianghlimna kawngah tan la turin a fuih a. Mizote chu sa duh tak hnam kan nih avangin heng atang hian parasite lo insiamin rulhut pai palh a awl a, chuvang chuan rulhut hlo ei kan ngai pawimawh tur a ni, a ti bawk. Zirlai kalkhawmte chu an zirna lamah taima tak leh thahnem ngai taka tan la zel turin Lunglei DC hian a chah bawk. 

Nikum National Deworming Day khan Lunglei District chhunga Government Aided School 420, Private school 144 leh Aganwadi Center a naupang 51,385 te hnenah rulhut hlo hi pek a ni a. Kuminah pawh Lunglei Distict School leh Anganwandi Centre hrang hrangah bialtu Health Worker leh Asha ten rulhut hlo Albendazole(400mg) an sem leh a. Hemi ni a rulhut hlo ei hmanlo te tan ni 17/08/2017-ah Mop Up Day hman a nil eh dawn bawk.