MJA Lunglei hmalaknain vawiin khan Civil Hospital, Lunglei OPD hmunah Lung lam (Cardiology) Doctor-ten 'One Day Free Heart Clinic' an nei a, tukin zing dar 9:30 khan HPC Vice-Chairman Pu S.Laldingliana chuan Clinic hi a hawng a ni.

Clinic hawnna inkhawm Civil Hospital Superintendent Dr.Lalsanga kaihhruaiah Khuallian Pu S.Laldingliana chuan Lunglei MJA, Civil Hospital Medical Superintendent leh Health Minister Pu Lal Thanzara hmalakna avangin a thlawna lunglam entirna tur Clinic buatsaih a ni chu a lawmawm tak zet a ni, a ti a. Hlawtling taka he One Day Clinic an neih theih nan leh damlo a tam thei ang ber inentir a, damna an chan theih nan duhsakna a hlan a ni.

MJA Lunglei President Pu K.Lalrinpuia pawhin thu sawiin hun rei tawh tak atang khan MJA, Civil Hospital hotute leh HPC Vice-Chairman Pu S.Laldingliana te nen Health Minister an dawrna rah a takin hmuh tur a awm ta chu a vanneihthlak tak zet a ni, a ti.

He One Day Free Heart Clinic-ah hian Dr.Loncy V.Lalzarliana, Super Specialist (Cardiology) bakah Department of Cardiology atangin doctor dang 2 - Dr.Vanlalngheti leh Dr.Vanlalhruaia ten damlo an en a. Doctor ten damdawi an chawh emaw exam ngai (x-ray, ECG, etc) emaw tihna man erawh chu damlo ten an chawi a ngai a; mi pakhat zelah ECG leh x-ray tih nan Rs.100/- lak a ni.