1821/2022-2023  
Lunglei the 5th, September' 2022 : Vawiin khan DC Conference Hall, Lunglei ah Women and Child Development Department buatsaihin Nu nau neih hnu a nu leh naute an in enkawl na atan sum fai tanpuina dawn theihna Scheme Pradhan Mantri Matru Vandan Yojana (PMMVY) Saptah ni 1- 7 September, 2022 chhung awh tur chu Lunglei Bawrhsap Pu Kulothungan A, IAS chuan a hawng.

PMMVY Hapta hawnna hun hi Pi.Lalramnunpuii Punte, District Programme Assistant, Women & Child Development, Lunglei in kaihruaiin Pu Kulothungan A chuan Pradhan Mantri Matru Vandana Yojana (PMMVY) hi Central Scheme pawimawh tak India rama hmeichhia (Nu) khawtlang leh chhungkua a an dinhmun chawikanna atan leh nu naupai leh a neih hnu a amah leh naute an in enkawl na atan pawisa fai tanpuina dawn theihna a ni a ti. Fa hmasa ber hring tan tanpuina Rs 5000/- ( Cheng sangnga ) dawn thin chu Rs 6000/- ( Cheng sangruk ) ah tihpun a nih tur thu a sawi a, PMMVY Hapta chhung hian nu a tam thei ang ber zawng chhuaka in ziak lut turin thawk tu te a chah a ni. PMMVY Hapta hi tangkai taka hmang theuh turin duhsakna a hlan bawk a ni.

PMMVY Scheme hi ni 1.1.2017 atanga District zawng zawng a hman tan turin India Sorkar chuan a siam a, Ni.1.7.2022 hnu lama Nu a fa hmasa ber tur pai emaw hring tan lawmman pawisa Rs 5000/- a dawn theih a. Fa pahnihna emaw a aia tam pai te tan a dil theih loh a, Nu sorkar hnathawk ten nau neih senso an bill let thei lo a ni. PMMVY Scheme hnuaia beneficiary te hamthatna dawn tur hi he scheme atan liau liau State in Bank Account a hawn Escrow Account ah Government of India leh State sorkarin an tum tur ve ve an dah ang a, chuta tang chuan beneficiary te account ah PFMS hmangin a lut dawn a ni.

PMMVY dil tura document ngai te chu, Diltu Aadhar, Diltu Pasal Aadhar, Nu an-natal checkup proof of document leh Bank photo passbook te a ni. Hamthatna Rs 5000/- dawntur hi installment thum a pek tur a ni.

Mizoram pumah PMMVY a inziak lut hi mi 32067 an ni a, Lunglei District ah chuan mi 5057 niin Lunglei Project ah 2264, Hnahthial Project ah 1460, Lungsen Project ah 936 leh Bunghmun Project ah 548 an ni. Lunglei District a mi inziaklut 5057 ah mi 4169 ten he hamthatna hi an dawng tawh a ni.