1419/2022-2023

Lunglei 29th July 2022 : Vawiin khan Sub-Hqrs, YMA Conference Hall, Lunglei ah Lobour, Employment, Skill Development & Enterpreneurship (LESDE) Department leh Central Young Mizo Association (CYMA) bakah Common Service Centre te buatsaihin  Sawrkar laipui hmalakna Pradhan Mantri Shram Yogi Maan- Dhan (PM-SYM) leh National Pension Scheme (NPS-Traders) chung chang thehdarh kawnga hmalak inzirtirna hun hman  a ni.

He hun hmanpuitu Labour, Employment, Skill Development & Entrepreneurship Department Secretary, Govt. of Mizoram  Pu Lalramsanga Sailo chuan thu sawiin Central YMA leh Labour, Employment, Skill Development & Enterpreneurship Department  chuan kawng hrang hranga thawh hona an lo neih tawh thin thu sawiin tun tuma Sawrkar laipuiin mipui hamthatna a siam thehdarh kawnga an thawk ho leh thei chu lawmawm a tih thu a sawi a, LESDE Department chuan sawrkar laipui hmalakna hrang hrang an buaipui nasat thu sawiin mihring thiamna tihhmasawnna kawng lam an kalpui nasat thu a sawi a, lehkhathiam sawrkar hna thawh tur hmu lo tamtak an awm tawh laiin mahni kutkawih hmanga hnathawh uar a tul tawh thu a sawi a ni. Pu Lalramsanga Sailo chuan sawrkar hnathawk lo ten kum 60 an tlin hnua pension an lak ve theih nana ruahmanna sawrkarin a siam chu vanneihthlak a tih thu sawiin a chhawr tangkai thei tur ten tangkai taka an hman theihna tura mipui hrilh hriatna kawngah nasa zawka hmalak a tul zia a sawi a, PMSYM leh NPS bakah e-shram chung chang ziakna pamphlet a tlangzarh nghal a ni.

Pu Zonunmawia, ALO, Directorate of LESED chuan he huna kal khawm, veng leh khaw hrang hranga YMA aiawh te leh Common Service Centre ten PMSYM leh National Pension Scheme chung chang sawifiahna neiin he scheme kalphung leh a thiltum hamthatna dawng thei ten an dawn theih nana zirtirna CSC leh YMA ten an mipui hnena an thehdarh dan tur chung chang a zirtir nghal a ni. Sorkar laipui chuan hnathawktu mahni kut ke a eizawng thlakhat an hlawh Rs 15,000/- ai a tam lo leh kum 18-40 inkar te tana he scheme hi siam a ni. He scheme zawmtute hian kum 60 an tlin atangin pension thla tin Rs 3,000/- an la thei dawn a ni a ti.

He hunah hian Central YMA Vice President Pu Lalhmachhuana chuan LESDE Department hi Department te  a ni a ,kil tin kil tang hrut a he scheme puangzar tur chuan an indaih dawn lova, chuvangin  mipui te hnena thleng tur hian sorkar in YMA te min rin avangin he scheme puanzar hna thawk tur hian thawh hona an siam thu a sawi a, he hamthatna dawng thei tur hian mipui a tam thei ang ber te hnenah hrilhhriat a pawimawh thu a sawi bawk.

YMA Sub Hqrs. Lunglei President Pu Lalrotluanga pawhin thusawiin sorkar laipui hamthatna an siam te hi kan hre tawk lo a, LESDE Department in YMA te he scheme  a hamthatna awm thei te puanzar kawnga hmalak pui tur in thawhhona siam a nih thu a sawi a, khaw hrang hrang leh veng hrang hrang YMA member ten midang te hrilh thei khawp a thiam turin member kalkhawm te a chah a ni.

Pu Vanlalawmpuia, District Labour Employment Officer, Lunglei in  kalkhawm te lawmna thu a sawi a Pu Lalmuanpuia Fanai, Deputy Director(Labour) , Directorate of LESDE in lawmthu sawina a nei bawk a ni.