Kumtin rampumah hman thin ‘RTI WEEK’ chu kuminah pawh October ni 5-11, 2013 chhungin hman a ni leh dawn a. Mizoramah pawh Aizawl bakah District hrang hrangah state sorkara Information & Public Relations Department leh Mizoram State Information Commission-te tangkawpin programme neih tum a ni.

Lunglei District-ah chuan October ni 9, 2013 (Nilaini) khian Mizoram State Information Commissioner Pu L.Hrangnawna, IPS(Rtd) hovin District SPIO, APIO leh Appellate Authority awm zawng zawngte nen RTI Act chungchang zirhona neih theih beisei a ni.

RTI Act hi June ni 15, 2005 khan Parliament-in a pawmpui hnuah October ni 12, 2005 atangin rampumah (Jammu & Kashmir tiam lovin) hman tan nghal a ni a. RTI Act-in a tum ber chu mipuiten sorkar hmalakna hrang hrang chungchangah zawhfiah emaw hriatchian emaw an duh ang ang chu sorkar pawhin rang leh dik taka a chhan theihna tura mipuite chanvo pek a ni a. Ramchhung leh khawvel ramdangah te pawh eirukna umbo te, langtlang sorkar din te, mi zawng zawng huapzo sorkar neih leh ramchhung inrelbawlna felfai a awm theihna turin RTI Act hi hman tan a ni.

Ramchhung state dangte rualinMizoramahpawhStateInformation Commssion din nghal a ni. Sorkar Department tinah RTI Act-a mawhphurtu Officer bik ruat vek an ni a, anmahni kaltlang hian thu zawh leh hriat duhte chu mipuiten Form lachhuakin zawhna an thehlut thei a ni. Mizoram State Information Commission office hi New Secretariat Complex, Khatla-ah a awm a; tuna Chief Information Commissioner ni lai mek chu Pu Lal Dingliana, IFS (Rtd) leh Information Commissioner chu Pu L.Hrangnawna, IPS (Rtd) te an ni.