Mizoram sorkarin kum 2001 atanga sports chi hrang hranga inelnaa titha zualte tana hamthatna a ruahman sak ‘Sports Incentive Cash Award’ chu vawiin khan Lunglei HPC Vice-Chairman Pu S.Laldingliana’n Lunglei SAI Extension Centre-a inkhawm buatsaihah Lunglei, Lawngtlai leh Saiha District atanga infiammi tithate hnenah a hlan.

Vawiina inkhawm Jt. Director, Sports & Youth Services Pu J.Vansangzuala kaihhruaiah Khuallian Pu S.Laldingliana chuan Mizoramin infiammi Chief Minister leh Sports Minister a neih hi infiammite tan a vanneih thlak hle a, sorkarin thalaite hmakhua ngaiin state chhungah sports infrastructure nasa takin a siam a, thenawm state-a infiammite it tham a ni mek a ni, a ti. Lunglei bik vanneihna chu High Powered Committee a awm hi a ni a, kuminah pawh sports lama titha zualte hnenah HPC Incentive Cash Award sem nan cheng nuai 7 bituk leh a nih thu leh SAI Extension Centre vertical extension siam nan cheng nuai 10 dah a ni bawk tih a sawi.

Lunglei District Sports Council Chairman Pu K.Lalawmpuia pawhin thu sawiin Mizote hi hnam naupang tak leh tlemte ni mahse Pathianin talent ropui tak sports lamah a pe a, Mizo infiammi hrang hrangte chu ram chhung leh pawnah che tha zelin, ram leh hnam an ti hmingtha mek a ni, a ti.

Tun tuma Lunglei, Lawngtlai leh Saiha atanga infiammi tithate hnena cash Award sem hi kum 2012-2016 a huam a, an zavaiin mi 1757 niin an sports discipline leh an thlen san dana zirin lawmman hi pek a ni a, a zavaia sumfaia pekchhuah zat zawng zawng chu cheng 1,66,29,750 a ni.

Sports Incentive Cash Award dawng hmasa ber chu R.Lalremliani niin kum 2001-2002 kum khan Rs.80,000/- a dawng a; 1st Asian Women Boxing Championship, Bangladesh-a August, 2001-a neihah Silver Medal a hawn a ni.