Vawiin chawhma khan Government Higher Secondary School, Lunglei chuan Saikuti Hall-ah 19th Annual Sports Closing Function an hmang a. Superintendent of Police, Lunglei District Pu Lalthafamkima Jongte, MPS – in he hun hi a hmanpui.

Pu Lalthafamkima Jongte chuan zirlai kalkhawmte chu taima tak leh thahnem ngai taka lehkha zir a, an hun awl te hmang tangkaia, rilru hrisel nei thei tura sports lampang pawh ngai pawimawh tel turin a chah a. Mizo zirlai tam tak ten an zirlai hriatthiam tum tak tak na rilru nei lo a, kum tawp a pass chauh an duh tawk thin chu pawi a tih thu a sawi a. Ram hmasawn tur chuan zirlaite’n tumruhna bakah tum sang tak an neih a tul a ni tiin zirlaite chu chhungkua, khawtlang leh ram tana chhawr tlak ni tura tha taka lehkha zir turin a chah a. Kumin UPSC Civil Services Examination-ah Mizoram atanga tling an awmlo chu pawi a tih thu sawiin, heng exama tling thei turin zirlaite chu tum mumal tak leh hmathlir nei rana lehkha zir zel turin a fuih. Lunglei SP chuan zirlaite chu nunphung leh thil chin thalo - zu, drugs, leh vaihlo leh a kaihnawih zuk leh hmuam te hawisan ngam turin a chah bawk.

Lunglei District chhunga Education Mentoring Project kalpui mek ah nimin 31st August, 2017 khan Lunglei SP Pu Lalthafamkima Jongte chuan Sacred Heart School, Lunglei a tlawh bawk a, zirlaite leh zirtirtute nen inkawmhona hun hmangin zirna kawnga hmasawn tura hmalak tul hrang hrang te an sawiho.