No.7528/2020-2021

Vawiin chawhma khan Civil Hospital Lungleiah Association for Voluntary Blood Donation (AVBD) Lunglei, Blood Bank Lunglei leh MSACS-te tangkawp buatsaihin Valentine’s Day pualin a duh apiang te tan  thisen pek run pui (Blood Donation Camp) hawn a ni. Blood Donation Camp thupui hi ‘Show Love, Give Blood- Thisen pe in, I hmangaihna lan tir rawh’, tih a ni.

Blood Donation Camp hawnna hun Pu Lalrammuana Chawngthu, Vice President AVBD Lunglei kaihhruaiah Lunglei Medical Superintendent leh Lunglei AVBD President ni bawk Dr SR Ngurchamliana chuan Valentine's Day chu hmangaihna midangte tana inpekna ni anih anga mamawhtu apiangte hman theih tura thisen pek runpui neih a ni chu inhmeh a tih thu a sawi a. Sum leh pai seng lova mite tanpui theihna hlu ber chu a thlawna thisen pek hi a ni tiin Mizoram hmun hrang hrang ah YMA, Zirna in, kohhran hrang hrang leh pawl dangte hmalknain a thlawna thisen pek kan uar hi a lawmawm takzet a ni, a ti a. Kan taksa a hrisel that phawt chuan thisen pek hi taksa tan a tha a, a hlauhawm lo a ni tiin Medical Superintendent chuan kalkhawmte chu an hriselna enkawl uluk tur leh thisen pek uar turin a chah a ni.

Vawiin Voluntary Blood Donation-ah hian Zohnuai East Unit TKP Lunglei ten thisen pe in a hmunah Blood Bank staff ten an kal chilh a ni. Lunglei Government College leh Government J Buana College zirlaite pawh he ni puala thisen pe tura sawm niin Civil Hospital Blood Bank leh Christian Hospital Serkawn Blood Bank-ah te thisen an pe a ni.

AVBD Lunglei hi 19th October, 2001 din a ni. Lunglei ah Blood Bank pahnih - Civil Hospital leh Christian Hospital Serkawn ah neih mek a ni a. Voluntary-a thisen pek chungchangah Lunglei District chhungah inzirtirna leh awareness campaign ngawrh taka neih thin niin mimal, zirlai, YMA leh pawl hrang hrang thahnemngaihna avangin damlo ten thisen an dawng thin a.

January – December 2019 chhung khan Lunglei Civil Hospital Blood Bank ah thisen unit 2597 lutin unit 2303 (88.67%) chu voluntary donation-a rawn lut a ni a. Nikum January – December 2020 chhung khan Civil Hospital Blood Bank ah hian thisen unit 2412 lutin unit 2298 (95.27%) chu voluntary donation-a rawn lut a ni.

Lungleia blood bank dang Christian Hospital Serkawn Blood Bank ah kum 2019 January - December khan thisen unit 1271 lutin unit 1170 (92.05%) chu voluntary donation a rawn lut a ni a. Nikum January – December 2020 chhung khan Christian Hospital Serkawn Blood Bank ah hian thisen unit 1010 lutin unit 976 (96.63%) chu voluntary donation-a rawn lut a ni.