3141/2022-2023 

Lunglei the 23th December' 2022: Vawiin khan DC Conference Hall Lunglei ah Good Governance Week 2022 pualin Workshop on Good Governance hun hman a ni. Pu C. Lalchhuana MCS (Rtd) chuan khuallian niin a hmanpui a ni.  

Workshop on Good Governance ah hian Lunglei District huamchhunga Head of Offices, YMA, BSF leh Assam Rifles hotute an tel a ni.

Workshop on Good Governance 2022 Pu Donny Lalruatsanga, Additional Deputy Commissioner, Lunglei kaihhruaiah Pu C.Lalchhuana chuan mipui mimir thleng phak rorelna tha leh huap zau hi  Good Governance a ni, a ti a. Good Governance neih theihna tur chuan langtlang rorelna, tumah thlei bik neilo, hmasawnna dik leh felfai, sum dik taka enkawl leh hmanral, hnathawh endik, hlemhletnna nuaibo, mipui phungbawmna hnuaia rorelna te hi pawimawh a tih thu a sawi a. Mitin mamawh leh kan chhawr nghal theih Public Distribution System(FCS&CA), kawlphetha, inkalpawhna, tui thianghlim, hriselna, social security, Education mumal tak neihte leh local self government tha leh chhenfakawm neihte hi Good Governance kan neih theihna atana thil pawimawh hmasa berte an ni a ti . Kan ram chhunga cheng mipuite  eizawnna ngelnghet siamsak hi pawimawh a tih thu a sawi bawk.

'Workshop on Good Governance’ ah hian Department thlan bik heng a hnuaia mi te hnen atang hian Presentation on Good Governance pekna hun an hmang :-

Lunglei  DC,  H&FW Department, School Education, FCS&CA leh Public Works Department ten an Department theuh hmalakna presentation an nei a. Hemi bakah hian Department thenkhat – DRDO, NYK, P&E, DTO, Election, UD&PA,  etc ten an hmalakna hrang hrang short film buatsaih an pho lang bawk a ni.

Lunglei SDO (S) Pi Carolyn LB Khiangte chuan lawmthu sawiin hun a khar a ni.