Vawiin khan PHE Department hnuaia Comunication and Capacity Development Unit buatsaihin 'Workshop On Water Quality For Private Water Sellers For Lunglei Town' chu PHED Conference Hall, Lunglei-ah neih a ni a, Lunglei Addl DC Pu Rothuama'n Workshop hawnna a hmanpui.

Workshop hawnna inkhawm Er.C.Lalzidinga, EE(P) Lunglei Circle kaihhruaiah Addl DC Pu Rothuama chuan mipuite hriselna lam ngaihtuahin hetiang workshop buatsaih a nih theih chu lawmawm a tih thu a sawi a. PHE Department hian mipuite tan tui thianghlim chauh ni lovin ek in tha an neih theih dan tur ngaihtuahin, mipuite hriselna kawngah hma an la nasa hle a; tunah pawh mipuite tana tui thianghlim pe theih turin Lunglei khawpui chhunga private-a tui zuar thinte kokhawmin an tui lakte a thianghlim leh thianghlim loh an hriat theih dan leh sawngbawl dan tur an zirtir hi a lawmawm hle a ni, a ti. Kan tui lakna hnar te mihringte in atan him lo a awm thei a, a thawktu PHE Department te nena tanghova mipuite hnenah tui thianghlim chauh pekchhuah nan tanlak a pawimawh a ni, a ti bawk.

Vawiina workshop-ah hian PC.Biakmawia, Chief Chemist, SRI. PHED, Mizoram chuan 'Tui Thianghlim Loh Theih Dan' tih thupui hmang in zirtirna a pe a, Pu.H.Lalchuailova, Chemist, Lunglei District Laboratory chuan 'Tui Tih Thianghlim Dan' tih thupui hmangin zirtirna a pe bawk ani. Pu.H.Duhkima, SE, PHED, Lunglei WATSAN Circle chuan sawihona, zawhna leh chhanna hun hman zawhah khaikhawmna a nei a; Pu F.Lalfakawma, SDO, Lunglei Distribution Sub Division, PHED chuan lawmthu sawina neiin Woprkshop a khar a ni.

Workshop thil tum tlangpuite :

1. Private-a tui hralh thin ten kan tui hralh thin ziarang (quality) dik tak hriat hi kan mawhphurhna a ni tih kan hriat theih nan he workshop hi buatsaih ani. Kan tui hralh thin chu a thianghlim leh thianghlim loh kan hriat chian a ngai a. Chumi tur chuan a tui kha test hm asak zet a ngai tih i hria ang u. Tui kan test tir chuan a lo thianghlim tawk lo a nih pawn a thianghlim loh dan chin kha kan hriat chian phah dawn ani.

2. Mipui hnen ah tui thianghlim chauh kan pek theihna tur atan a inhrilh hriatna leh in zirtirna atan he workshop hi buatsaih ani.

3. He workshop hi tui thianghlim lovin kan hriselna a tih khawloh theih dan te in hrilh hriatna atan buatsaih ani. Kan taksa hian tui tam tak a mamawh laiin tui thianghlim lo kan in chuan kan hriselna in a tuar dawn a. Tui atanga inkaichhawn theih natna tam tak a awm a. Chuvangin, kan natna 80% deuhthaw hi tui ken natna leh tui lam kaihhnawih natna niin hriat ani. Chuvangin, kan tui pek chhuah tur chu a thianghlim ngei tur ani.

4. He workshop ah hian kan tui hralh thin te a lo thianghlim loh theih dan leh tui enkawl uluk pawimawh dan te in hrilh hriat tur ani. Chutichuan, vawiin workshop a lo tel tui hralh thin ten a kan hriat tur pawimawh deuh chu Lunglei khawpui mite hriselna hi engemaw chen kan kovah a innghat tlat ani tih i hre thar ang u.

Lunglei RD Block leh Hnahthial RD Block huam chhung a Village Water & Sanitation Committee, VC leh YMA ten naktuk ah Grass Root Level Training On Water Quality Monitoring And Survilance Programme 1) Water Quality & Laboratory hnathawh dan phung. 2) Khawtlang tui lak chung chang a PHED hmalakna leh enkawl zui na a khawtlang mawhphurhna. 3) Sanitation leh Hriselna inkungkaih dan. 4) Tui sample collect dan leh tui test tir pawimawhna tih thupui hmangin PHED Conference Hall, Lunglei ah Workshop an nei ang.