3975/2022-2023

Lunglei the 24th March' 2023: Vawiin khan DTC Conference Hall, Lunglei ah World Tuberculosis(TB) Day 2023 hman a ni a, Pi Ramdinliani, IAS Deputy Commissioner Lunglei chuan a hmanpui. Kumin thupui atan "Yes! We can End TB!" tih hman a ni.

World TB Day 2023 hmanna inkhawm hi Dr. LC. Liana, Chief Medical Officer, Lunglei in kaihruaiin Lunglei DC Pi Ramdinliani chuan thusawiin Ministry of Health & Family Welfare Government of India chuan kum 2025 chhungin TB tihrem a tum a, chumi atan chuan sawrkar chauh in hma a la thei lova, chuvangin Community Support (vantlang mipui te telna) a ngaih thu a sawi a. Ram changkangah chuan TB natna hi umbo a ni tawh a, India ram chu TB vei tamna ram pariat zingah kan la tel a, kan ei leh in that tawk loh vang te, zuk leh hmuam kan tih tam lutuk vang te a ni thei a ni a ti. TB hi Mizoram ah chuan tar natna ah kan ngai thin a tunah chuan thalai kum 20-39 inkar vei an tam ber a, kan hriselna te kan ngaihpawimawh tawk loh leh uluk loh vang a nih thu a sawi a, TB hi natna tihdam theih a ni a, a vei ten inenkawlna la tha turin a chah a. TB natna umbo nan kan ram, kan District ten tih theih kan nei a ni tih hre renga ke pen chhuak theuh turin a chah bawk a ni. Pi Ramdinliani hian Central Sorkarin Community Support a phut let angin TB natna vei pakhat enkawlna a tum tur thu a sawi bawk.

Dr K. Lalhmachhuana, District Tuberculosis Officer, Lunglei chuan report pein Lunglei DTC ah hian Doctor 1 leh thawktu 14 awmin WHO tarlan danin kum 2022 chhungin khawvel ah TB vei 30,000 awmin mi 4400 in an thihpui a ni. Mizoram ah TB vei kum 2018 ah mi 2602, kum 2019 ah mi 2996, kum 2020 ah mi 2296, kum 2021 ah mi 1725 leh kum 2022 ah mi 2082 hmuhchhuah an ni a. Lunglei District ah kum 2022 chhungin TB vei mi 154 awmin enkawl dam mi 127, enkawl lai mi 22 leh thi mi 5 an awm thu a tarlang a ni. January leh February 2023 ah mi 299 exam ah TB vei mi 29 hmuhchhuah a ni bawk. TB vei naupang ber chu thla 4 mi niin upa ber chu kum 91 mi a ni. Khawpui ah 53% leh thingtlang ah 47% TB vei an awm a ni.