3566/2022-2023 


Lunglei the 13th February, 2023 – I&PR Department, Lunglei District leh South Art Mizoram te tangkawp buatsaih ni thum awh tur (13th – 15th February, 2023) ‘Lunglei Arts Festival, 2023’ chu vawiin chawhma khan Lunglei Bawrhsap Pi Ramdinliani, IAS in Art & Culture Auditorium, Venglaiah a hawng. Pu LT Zohranga, Senior Artist chu he hunah hian khualzahawm a ni.

'Lunglei Arts Festival 2023' ah hian Lunglei artist 26 ten an kutchhuak 91 an pholang a. Artwork thenkhat hi lei theih anih bakah book stall, face painting stall, handicraft stall engemawzat buatsaih a ni a, artist te hian a hmunah mural painting an tih chilh bawk a ni.

Hawnna inkhawm Lunglei DIPRO Pi C. Lalremruati kaihhruaiah Lunglei DC Pi Ramdinliani chuan kalkhawmte chibai bukin Lunglei Arts Festival chu Art leh Artist-te hmasawnna atana rahbi thar thlentu anih ngei a beisei thu a sawi a. Art hlutna leh pawimawhna hrang hrang tarlangin Pi Ramdinliani chuan Art hmangin artist ten ngaihtuahna khawvel hranah min hruai thei a, Art hi hnam nunphung leh ziarang vawn țhatna pawimawh ber pakhat a ni tiin tourism kan promote na kawngah pawh Mizoram artist te kutchhuak te tun aia kan hman tangkai a tul a ni, a ti a. Artist hlawhtling leh daih rei ni turin talent neih piah lamah taimakna leh thawhrimna a pawimawh takzet a ni tiin artist kalkhawm te chu taima taka an talent te tuai hriam zel turin a chah a. An art phochhuah leh hralh kawngah tunlai khawvel changkanna in a ken tel IT leh social media-te hmang tangkai turin a chah a ni.

He huna khualzahawm Pu LT Zohranga, Senior Artist leh Zomoi School of Fine Arts dintu chuan Artist te thiamna chu thil ti thei tak anih thu sawiin lemziak thiam thalaite chu an talent ram leh hnam hmasawnna atan leh khawtlang nuna thalote siamthatna tur leh mipuite zirtirna atana hmang tangkai turin a fuih a. Lunglei Arts Festival 2023 chu art hmasawnna atana mellung pawimawh tak a ni tiin he Festival hian rah tha tak a neih ngei a beisei thu a sawi bawk.

Vawiin Lunglei Arts Festival 2023 hawnna inkhawm ah hian official-te, media mite,Lunglei Photographers Association hruaitute leh college zirlai thahnem tak an tel a ni. 

Attachment

  • Loading attachment...