Nimin June ni 17, 2014 (Thawhlehni) khan Lunglei Bawrhsap Pu Ashish Madhaorao More chuan Tuipui ‘D’ leh Hnahthial Sub-division a tlawh a, sorkar hnathawkte leh khawtlang hruaituten lo hmuakin an biala harsatna leh mamawh hrang hrangte Bawrhsap hnenah an thlen a ni.

Hun engemawchen atanga Tuipui ‘D’-a bungrua leh mihring phurh nana hman reng thin mar-boat chu a chhiat avangin Tuipui ‘D’ ral leh lam ve vea chengten harsatna an tawh thu hriain Lunglei DC chuan Tuipui ‘D’ YMA House-ah khawtlang hruaitute leh ‘Stone & Gravel Loading Association’ (SAGLA) hruaitute nen inkawmna hun an hmang hova; hetah hian S.Vanlaiphai leh Darzo khua VC member te pawh an tel a ni. Tuipui ‘D’ leh a chhehvelah inbiakpawhna (mobile connectivity) tha a awm loh thu leh lawng chetsual vanga nunna chan tate chhawmdawlna chungchang khawtlang hruaituten Bawrhsap hnenah an thlen chu Pu Ashish More chuan ngaihtuah zui vat a nih tur thu a hrilh a ni.

Lunglei Bawrhsap Pu Ashish More chuan Leite khua bula NREGS hnuaia tui thianghlim lakna an sak mek chu a tlawh bawk a ni.

Hnahthial Sub-division a tlawhnaah PWD IB kawtah public meeting buatsaih a ni a, hetah hian sorkar department hrang hrang aiawhte leh khawtlang hruaitute an tel kim tha hle a. Pu Ashish More chuan thu sawiin Hnahthial chu Lunglei District-a hmun pawimawh tak a ni a, chuvangin mipuite hamthatna tura sorkar hmalakna hrang hrang kalpui mekah theihtawp chhuah turin a ngen a ni. Hnahthial Sub-division huamchhunga sorkar department ten an hmalakna kalpui chungchang DC hnenah an hrilh a. PHE Department chuan Greater Hnahthial Water Supply Scheme (GHWSS) pawh tun thla chhungin ‘test pump’ nei hman an beisei thu an sawi a. Revenue Department hnuaiah Hnahthial viltu tur Surveyor mamawh a nih thu Bawrhsap an hrilh bawk a ni. Heng bakah Health, AH&Vety, KVK, PWD leh Education Department te pawhin an hnathawh chungchang an tarlang a ni.

Lunglei DC Pu Ashish More hi Addl. DC Pu Lalhmachhuana, DTO Pu K.Laltlawmlova, DIPRO Pi Mina Zoliani, Hnahthial SDO(C) Dr.Lalngura Tlau leh Hnahthial BDO Pu V.Laldinsanga ten an tawiawm a ni.