1243/2024-2025

2024 Vawkhniahzawn thla ni 20: Vawiin chawhma khan Lunglei District Bawrhsap Pu R. Lalṭhazuala chuan Civil Hospital Lunglei tlawhin, an dinhmun a enfiah.

Bawrhsap hi Additional Deputy Commissioner Pu James Miahlung leh District Information & Public Relations Officer Pu C. Lalhruaitluanga te'n ṭawiawmin, Senior Medical Superintendent Dr Laldinmawii hovin Civil Hospital Lungleia thawktute'n an lo dawngsawng a. Civil Hospital Lungleia ward hrang hrang leh department/room hrang hrang te fanpuiin, khawl leh hmanraw chi hrang hrang dinhmun te, thawktu dinhmun leh damdawi in inrelbawlna kaihhnawih thil hrang hrang bakah, an mamawh leh harsatnate Bawrhsap hnenah hian an lo thlen a ni.

Lunglei Bawrhsap Pu R. Lalṭhazuala chuan Lungleia Bawrhsap mawhphurhna a lak hnuah a hma lama damdawi in tlawh a, an dinhmun a hmuna a hmuhpui thei chu lawmawm a tih thu sawiin, Civil Hospital Lunglei inrelbawlna hmuh nuam tak leh sawrkar laipui aṭanga quality certified an ni tih hriat chuan a tilawm lehzual tih a sawi a. Ram mipui a te ber aṭanga a lian ber thleng nghawng a nih avangin hriselna chu ngaihthah a rem lo va, District chhunga hriselna lam tihchangtlun leh District mipuite hriselna tura hma lakna kawngah theih tawp chhuaha ṭan ho a ṭul tih a sawi a. Hriselna lama thawktute chu nakin zelah pawh an mamawh leh an harsatnate a hnena thlen hreh lo tura chahin, an mamawh an sawite chu a theihna chin chinah theih tawp chhuaha bawhzuipui a tum thu a sawi a ni.

Lunglei Bawrhsap leh Civil Hospital Lungleia thawktute hian Civil Hospital Lunglei tihchangtlunna tura hma lakna kal mek chungchang leh hmabak la awmte bakah, an hmathlir te an sawi ho bawk a ni.

Civil Hospital Lungleiah hian tun dinhmunah Senior Medical Superintendent hovin doctor 33 an awm mek a. Psychiatrist tih loh chu department zawng zawngah doctor an awm kim a; psychiatry department pawh clinical psychologist hovin pangngai taka kalpui a ni.

Damdawi in inrelbawlna leh thawktute theihna, thiamna leh hna thawh danphunga tehfung hrang hrang hmanga India rama hospital ṭha bik tehna, National Quality Assurance Standards (NQAS) certification chu June ni 15, 2024 khan Civil Hospital Lunglei hian Sawrkar Laipui Ministry of Health & Family Welfare aṭangin a hmu a. NQAS certification dang pahnih - MusQan (naupang lam enkawlna ṭha bik) leh LaQshya (nau neihna hmun ṭha bik) certificate dawng tel bawkin, Northeast India bikah Civil Hospital Aizawl nen a ruala heti ang certificate pathum dawng thei hmasa ber an ni a. Mizoramah NQAS certified facility hi pariat an awm mek a ni.