1236/2024-2025

2024 Vawkhniahzawn thla ni 19: Vawiin khan All India Survey on Higher Education (AISHE), Mizoram Unit-in Mizoram chhim lama zirna in sang (higher education institution)-a nodal officer-te tan Higher And Technical Institute Mizoram (HATIM), Lungleia AISHE chungchang zir hona (training) an buatsaih chu Lunglei District Bawrhsap Pu R. Lalṭhazuala'n Khuallian niin a hmanpui.

Lunglei Bawrhsap Pu R. Lalṭhazuala chuan Lungleia Bawrhsap mawhphurhna a lak hnua function a telna hmasa ber zirna kaihhnawih a ni chu lawmawm a tih thu sawiin, zirna chu ram hmasawnna atana hmanraw ṭangkai ber pakhat a nih avangin ngaih pawimawh a ṭul hle tih a sawi a. Ram chhung ei leh bar dinhmun (economy) ṭhan nan mi thiam chhawr tlak chher chhuah a ṭul a, chumi atan chuan zirna in sangte'n mawhphurhna sang tak an nei a ni tiin, zirna kawngah harsatna tam tak awm mah se, sawrkar leh thawktute leh mipuite phei khai rual taka thawh hona aṭangin hma sawn theih a ni, a ti a. Mizorama zirna dinhmunin hma a sawn zel theih nan kan dinhmun hriat chiah hmasak a ṭul tih sawiin, chumi atan chuan report dik taka pe ṭhin tur leh training chu chhawr ṭangkai a, AISHE-in a ken tel tehna hrang hranga hma sawn thei tura theih tawp chhuah turin nodal officer kal khawmte chu a chah a ni.

He hunah hian AISHE Mizoram-a State Nodal Officer Prof. Jamal Hussain chuan inlawmna thu sawiin, AISHE zir chianna report 2021-a Mizoram dinhmun a tar lang a. HATIM Lunglei Vice Principal Dr R. Lalnunthara pawhin thu sawiin, HATIM Lungleia AISHE Nodal Officer Pu H. Lalrinawma'n lawm thu a sawi a. Chawhnu lamah technical session leh interaction hun hman niin, AISHE hnuaia Mizoram chhim lama zirna in sangte dinhmun thlir ho a nih bakah, hma sawnna tura rawtna hrang hrangte sawi ho a ni a. Hma lak dan tur ruahmannate duan a ni bawk.

AISHE hi India ram puma zirna sang (higher education) dinhmun zir chianna niin, zirna in hrang hranga zirlai, zirtirtu, zirna peng, exam result, sum leh pai dinhmun leh zirna hmanraw neih changtlun dan te zir chianna a ni a. Mizoramah hian AISHE hnuaia inziak lut zirna in sang - university 3, college 40 leh standalone institution 52 an awm mek a. Zirna sang, college chin chung lama pawl tina zir thei tur kum bi ṭhena mihring awm zat leh a taka zirnaa inziak lut khaikhinna (gross enrolment ratio - GER)-ah national average 28.4% a nih laiin, Mizoramah kum 2020-21-ah 26.8% leh kum 2021-22-ah 32.3% niin, a pung zawngin a kal a. AISHE Mizorama thawktute chuan GER 50% tlin chu tun dinhmuna an tum ber pakhat a nih thu an sawi.