Lunglei Chanmari Hall chu vawiin tlai khan Chief Minister Pu Lal Thanhawla chuan a hawng. Hall hawnna inkhawmah hian Local Administration Minister Pu PC  Lalthanliana leh PWD Minister Pu Lal Thanzara te telin, MYC Chairman Pu Joseph Lalhimpuia, Chanmari Hall Committee Chairman ni bawk chuan hun a kaihruai a ni.

Chief Minister Pu Lal Thanhawla chuan Lunglei Chanmari Vengin hall thar tha tak an nei chu a lawmpui thu a sawi a. Inkhelhna hmunhma tha an neih thar chu a bik takin thalaiten an tangkaipui ngei a beisei thu a sawi bawk. Sawrkarin state hmasawnna atan hmasawnna ruuhrel tha tak tak ruahman a din thin in, tunah pawh a la kal mek zel a. Hengte hi ruahman ang taka a hlawhtlin theih nan sawrkar nen lungrual taka mipui an thawhho a pawimawh thin thu a sawi a. Vantlang tana tangkai tur thil siam leh din te hi a hmangtangkai tuten neitu rilru pu chunga dimdawi leh fai taka an enkawl thiam a tul thin thu a sawi bawk.

State sawrkarin mi harsa zawkte a ngaihsak thin thu sawiin Chief Minister chuan NLUP avanga eizawnna ngelnghet nei ta tam tak an awm phah thu a sawi a. NLUP avanga Mizoram economy pawh India state dangte zinga economy thang tha ber state pali zinga a mi a nih tak thu te a sawi bawk. Chief Minister chuan  NLUP hlawhtlinna belhchhahtu atan NEDP chu ruahman niin, thalaite eizawnna kawng zau zawka hawn a nih thu a sawi bawk a. CM Pu Lal Thanhawla chuan ram changkang tur chuan inkalpawhna tha neih a tul thu leh, chumi atan chuan rel kawng Mizoram chhim thleng lut thei tura ruahmanna siam a nih thu te sawiin, Kaladan Multi Modal Project zawh fel a nih hnu a insumdawntawnna tha zawk leh lian zawk a awm tur te sawiin, chung hmasawnna in a ken tel vanneihna hmang tangkai thei tur chuan mitinin ram hmangaihna leh ram tana thahnemngaihna nen tangrual tak chunga kan thawhho a pawimawh a ni, a ti. Pu Lal Thanhawla chuan Pathian ringtute awmna state kan nih avangin state hmasawnna tura a hmalaknate chu Pathian ring chunga kalpui a nih chuan a hlawhtlin thin a ni a ti.

LAD Minister Pu PC Lalthanliana leh PWD Minister Pu Lal Thanzara te khawtlang tana tangkai tur Hall changtlung tak hawn a nih avanga khawtlang mipu an lawmawmpuina thu leh neitu rilru pu a enkawl zui zel turin kalkhawmte an chah a ni.

Hun kaihruaitu Pu Joseph Lalhimpuia chuan Mizoram sawrkarin Mizoram Youth Commission kaltlanga thalaiten ngaihsan tlakte ngaihsan nachang an hriat a, chawimawi phu te chawimawi an nih nan award siam a, eizawnna dap kawnga inkaihhruaina tha zawk leh kawng inkawhhmuhna tangkai a nih thu a sawi a. Vawiina Hall hawn tak pawh chu thalai infiammite tan a tangkai tak a nih dawn avangin a lawm thu a sawi bawk.

Er. Lalmuankima Henry, Chief Engineer Buildings, PWD chuan Hall sak dan report tlangpui a pe a. Chanmari YMA Hall hi Public Works Department in cheng nuai 496.19 ruahman a ni a, DoNER atangin sum hi hmuh a ni. January 2015 khan sak hna hi tan a ni a, a kar lakah Hun engemawchen chawlh lailawk awmin, kumin August ni 7 khan sak puitlin a ni. Ground Floor hi Basketball Count leh Badminton Court 3 a hman theih niin, mipui thutna gallery, stage, dressing room leh toilet dah a ni a. A zau zawng hi 1148 sq. metre a ni. Main Hall area bakah hian basement pathum awmin, Basement-I ah Dormitory, Office, changing room te dah a ni a, Basement-II ah lirthei park na siam a ni. Indoor Stadium hi Govt. P/S-II  hmun a sak a nih avangin school building thiah tak chu  sak kep a ni a, Basement-III ah class room leh staff room bakah toilet dah a ni a. Basement-IV chu Govt. P/S I tan vek choka, dining room leh toilet block Siam a ni bawk.

Chanmari Hall sakna atan hian Pu Joseph Lalhimpuia chuan MLA Fund atangin sanctioned estimate a tello, infiamna atana pawimawh floor carpet lei a ni a. He floor carpet phah hi "Enlio" (Japan leh China collaborate Technology) a siam niin, hetiang flooring hi North East ah phah hmasak ber a hriat a ni. Chief Minister Pu Lal Thanhawla chuan Chanmari Hall a hman tur hian Table Tennis Board pathum pe bawkin, hall a hman tur sound system pek a tiam bawk a ni.

Hall hawnna inkhawmah hian khawtlang mipui leh Lunglei DC Dr. Ankita Chakravarty, Lunglei SP Pu C. Lalthanmawia leh district office hotu dangte an tel a. Pu Zorema, Vice-Chairman, Lunglei Chanmari Hall Committee hnen atanga thusawi ngaihthlak ni bawkin, Pu V. Rohmingthanga, President, YMA Chanmari Branch chuan lawmthu sawiin hun a khar a ni.

 

Attachment

  • Loading attachment...