No.2056/2020-2020 

Vawiin khan Aizawl atangin mithiam rual (Expert team) ten Lunglei rawn tlawhin Lunglei Civil Hospital-a RT-PCR Diagnostic Laboratory bun tura sawrkarin a ruahman mek chu inspection neiin hmalak tul te an enfiah.

Lunglei Civil Hospital-a RT-PCR bunna tur enfiah tur hian Dr. H. Lalhlenmawia, HoD, Department of Pharmacy, RIPANS leh Prof John Zothanzama, Dept of Environmental Sciences, MZU bakah Dr. Vanramliana, Asst Professor, Zoology, PUC te thawk chhuakin an ni hian uluk takin Lunglei Civil Hospitala RT-PCR Laboratory tur chu an en a, hemi atana ruahman Room pathum ruakte chu a tha tawk tura an rin thu an sawi a. Awm lo atanga bul tan tur an nih avangin a khawl chah chhung mai bakah Laboratory a nih dan tura puahchah chhung chuan hun a duh deuh tur thu sawiin khawl man leh a behbawm lei nan cheng nuai 100 chu a lo berah a tul dawn thu an sawi a ni. 

Expert Team-te hian RT-PCR Laboratory puitling set-up tur hian sawrkarah recommendation an thehluh tur thu an tarlang a. Tin, Lunglei Civil Hospital-a RT-PCR Diagnostic Laboratory bun tur chungchang hi Health & Family Welfare Minister Dr R. Lalthangliana'n Indian Council of Medical Research (ICMR), New Delhi hotute hnenah vawi engemawzat thlen tawhin hma alak mek thu Expert Team-te hian an sawi bawk a ni. 

Hetih lai hian Lunglei Civil Hospitala tuna Covid 19 hri endikna atana hman mek TrueNat khawl pahnih te bakah a aia tha leh chak zawk, Covid 19 positive pawh nemnghet nghal thei TrueNat Quatro chu reilote a Lungleiah neih belh anih tur thu an sawi bawk.

 Heng mithiamte hi Lunglei HPC Vice Chairman Pu Lawmawma Tochhawng leh Bamboo Development Board Vice Chairman Dr. K. Pachhunga leh Civil Hospital Med. Suptd. Dr. SR. Ngurchamliana bakah Lunglei CMO Dr. Thani Pachuau ten an tawiawm a ni.