No.5066/2020-2021

Vawiin 14/09/2020 (Monday) chawhma khan Lunglei HPC Vice Chairman Pu Lawmawma Tochhawng, MLA  leh Bamboo Development Board Vice Chairman Dr K. Pachhunga, MLA te kaihhruaiin Lunglei Civil Hospital-a RT-PCR khawl dahna tur enfiah a ni. Lunglei Civil Hospital Medical Superintendent Dr SR Ngurchamliana leh a thawhpui doctor rual ten lo dawngsawngin hmalak dan tur an sawiho a ni.

Covid-19 hrileng dona atana hmalakna kal zelah Civil Hospital, Lunglei-a RT-PCR khawl bun a nih theihna turin 15/08/2020 ah H&FW Minister Dr. R. Lalthangliana kaihhruaina hnuaiah enfiah a ni a. Tun dinhmunah chuan RT-PCR khawl hi Hospital building chhunga dah mai theih anih loh avangin Pu Lawmawma Tochhawng, MLA, Dr K. Pachhunga, MLA leh Lunglei Medical Superintendent-te chu RT-PCR khawl dahna tur Civil Hospital compound leh hmun remchang dangte lo en a ruahmanna lo siam turin sawrkarin a rawn ruat a ni. 

Vawiin inspection team chuan Lunglei Civil Hospital Compound huamchhunga OPD Complex hnung lam, ram ruak chu RT-PCR khawl dahna building sakna tura sawrkarah recommendation thehluh an rel a. Helai hmun hi motor a tlan luh theih bakah Civil Hospital building nen in nek chep lova building hran sak theih a ni a. Doctor te chuan RT-PCR khawl dahna ruahmanna tura a him thu MLA-te hi an hrilh a. Building sakna tur hian estimate siam nghal tur niin sawrkar hotute hnenah thlen a ni ang.

Pu Lawmawma Tochhawng, MLA leh Dr K. Pachhunga, MLA te chuan Covid-19 hrileng do kawngah Lunglei District mamawhte sawrkarin rang taka a rawn ruahman sak thin chu lawmawm an tih thu an tarlang a. Tun hnai maiah National Health Mission (NHM) kaltlanga Ambulance tha tak (Tata Winger) Lunglei Civil Hospital-ah an rawn pek avangin lawmthu an sawi bawk. Lunglei District-a Covid-19 hrileng do kawnga theihtawp chhuahtu Health Department hnathawkte, District Level Task Force, VLTF-te, tlawmngai pawl hrang hrang, kohhrante leh mipuite chungah lawmthu sawiin finkhur chhunzawm zel tur leh sawrkarin kaihhruaina a siam te uluk taka zawm turin mipuite an chah bawk a ni.