No.464/2021-2022

Lunglei the 10th May, 2021 – Lunglei Civil Hospital TrueNat Laboratory-a hman tur Molbio TrueLab Uno Dx khawl pakhat chu H&FW Department ruahmannain vawiin khan Aizawl atangin Lunglei rawn phurh phei niin tlai dar 4-ah khan Lunglei Civil Hospital rawn thlen pui a ni.

Lunglei Medical Superintendent Dr SR Ngurchamliana chuan khawl hi laboratory-a dah luha hman nghal anih tur thu a sawi.

Heti hian tun dinhmunah Lunglei Civil Hospital TrueNat Laboratory-ah Truenat Quattro khawl (vawi khata sample pali test rual thei) pakhat leh Molbio TrueLab Uno Dx (vawi khata sample pakhat test thei) khawl pakhat a awm a ni. Lunglei Civil Hospital TrueNat Laboratory-ah hian nikum 12th June, 2020 atang khan swab sample test tan niin nimin (May ni 9, 2021) thleng khan sample 8820 test tawh a ni a, sample 408 Covid-19 positive hmuhchhuah tawh a ni.

Lunglei CMO Office hlui building, Chanmari I-ah leh Civil Hospital Kiosk-ah Rapid Antigen Test (RAgT) leh swab sample collection kalpui reng a ni a. Sawrkarin rate a bituk angin Truenat Test hi Rs. 1000/- niin RAgT hi Rs. 200/- a ni. Hemi bakah hian H&FW Department chuan May ni 3, 2021 khan Notification ti chhuakin Christian Hospital Serkawn (CHS) chu Rapid Antigen Test (RAgT) kaltlanga Covid-19 screening kalpui phalna a pe a. CHS-ah hian Rapid Antigen Test (RAgT) hi kar hmasa zirtawpni May ni 7, 2021 atang khan kalpui tan niin tun dinhmunah Covid-19 positive hmuhchhuah anla neilo. CHS-ah hian test man hi duty hours (9:30 am – 4:00 pm) ah Rs. 500/- niin duty hours piah lamah Rs. 600/- a ni thung.