No.962/2021-2022

Lunglei the 14th June, 2021 - Lunglei Civil Hospital TrueNat Laboratory-a hman tur Molbio Truelab Quattro khawl pahnih leh a kaihhnawih khawl dang engemawzat Agriculture Minister leh Lunglei West bialtu MLA ni bawk Pu C. Lalrinsanga leh Lunglei HPC Vice Chairman leh Lunglei East bialtu MLA ni bawk Pu Lawmawma Tochhawng ten an MLA Fund atanga an donate chu vawiin khan Aizawl atangin Lunglei rawn phurh phei niin tlai dar 3-ah khan Lunglei Civil Hospital rawn thlen pui a ni.

Hemi pual hian Lunglei Civil Hospital kawtzawlah inhlanna hun tawi hman niin Lunglei East bialtu MLA Pu Lawmawma Tochhawng, Lunglei South bialtu MLA Dr K. Pachhunga leh official-te, media mi te leh party hruaitute an tel a ni.

Lunglei East bialtu MLA Pu Lawmawma Tochhawng chuan ‘Covid-19 hrileng in zual lam a pan zel avang leh Civil Hospital Lunglei (CHL)-a RT-PCR khawl dahna tur hmun ‘Laboratory Block' siam tum chuan hun ala duh deuh dawn avangin tun dinhmuna kan mamawh lo phuhruk na turin H&FW Department hotute nen inrawn tlangin CHL Truenat Laboratory ah khawl dah belh ni se tih kan rawt ta a ni’ a ti a. Hrileng avanga harsatna tawh karah sawrkarin theihtawp a chhuah chhunzawm zel dawn a ni tiin mipuite chiai lo turin a chah a. CHL-a Laboratory Block’ hi peih fel anih hunah Pu Zodintluanga, Thorang bialtu MLA-in RT-PCR khawl a rawn donate chu laboratory a lakluha, hman tum anih thu a sawi bawk.

Lunglei West bialtu MLA Pu C. Lalrinsanga leh Lunglei East bialtu MLA Pu Lawmawma Tochhawng te hian Truelab QUATTRO Real Time micro PCR analyzer pakhat (1), Trueprep AUTO device pahnih (2), Truelab micro PCR Bluetooth Printer pakhat (1), SMPS (AC Adapter) pahnih (2), Truepet 6ul pakhat (1) leh Truelab Real Time Micro PCR Workstation Accessories pakhat (1) ve ve an donate a. Heng an khawl donate te hi Rs.14,56,000/- man hu ve ve niin a zavaiin Rs. 29,12,000/- man a ni. Heng khawlte bakah hian accessories leh Sample Prep Kit, Sample Pre Treatment Pack etc cheng nuai 8 man hu a tel bawk a ni.

Lunglei Medical Superintendent Dr SR Ngurchamliana chuan khawl te hi Civil Hospital Lunglei aiawhin alo dawng a, mipuite hmakhua ngaia MLA Fund atanga khawl donate ani chu lawmawm a tih thu sawiin heng khawl te hi company engineer ten an rawn install fel veleh hman nghal anih tur thu a sawi.

Heti hian tun dinhmunah Lunglei Civil Hospital TrueNat Laboratory-ah Truelab Quattro khawl (vawi khata sample pali test rual thei) pathum leh Molbio TrueLab Uno Dx (vawi khata sample pakhat test thei) khawl pakhat a awm a ni.

Vawiin vek khan Pu C. Lalrinsanga chuan a bial chhunga 4C ah tanpuina pe in a aiawhin Pu Lalruatpuia, PS to Minister-in a hlan a ni.