4376/2024-2025

Lunglei, 2025 Ramtuk thla ni 21: Vawiin khan Lunglei District Deputy Commissioner ruahmannaa din inspection team chuan Lunglei leh Tlabung inkar National Highway-302 kawngpui laih zauh hna thawh mek dinhmun chu a hmunah kal chilhin an enfiah.

Inspection team hi Additional DC & Competent Authority for Land Acquisition (CALA) Pi Rochuangkimi Khenglawt chuan hovin, Tlabung SDO (Civil) leh Lungsen BDO te, I&PR, PWD leh DC office LA Branch official-te, Lunglei Sub-Headquarters YMA hruaitute leh NH-302 Ngaihven Pawl te an tel a. He lai kawngpui zauh hna thawh mek enkawltu National Highways & Infrastructure Development Corporation Limited (NHIDCL) hotute leh hna thawktu contractor-te'n lo dawngsawngin, an hna thawh mek dinhmun leh hmachhawp te an lo hrilhfiah a. Kawng laih hna leh kawng luan hna thawh mek dinhmun te, leivung paihna hmun te, Chhumkhum, Lungsen leh Tuichawnga khaw chhung helna kawng by-pass road siam mek te en hovin, kawng siam nana hman tur lung lakna hmun (quarry) bakah, kawng siam nana hmanraw hmante a ṭhat tawk leh ṭhat tawk loh endikna Constructions & Project Quality Control Laboratory hmun te an tlawh bawk a. Inspection team chuan kawng luan hna thawh tawh chin chu tun dinhmunah chuan ṭha thawkhata an hriat thu sawiin, hna muang deuh lai nia an hriat leh ngaih pawimawh hmasak ngai laite chu fur tlak hmaa a theih anga chaka thawk turin hna thawktute chu an chah a. Fur laia mipui chakkhai leh mamawh phurhna leh khualzin veivahna kawngah harsatna a awm loh nan Phairuangkai lei leh Tuichawng lei te thawm ṭhat dan tur ruahmanna an sawi ho bawk.

NH-302 kawngpui zauh hna thawh mek hi Hrangchalkawn aṭanga Tlabung thleng niin, kawng hluiah chuan kilometre (KM) 96-a thui a ni a. Tuna kawng thar ruahman ang chuan KM 75.070-a thui tur niin, package hnihah ṭhen a ni a. Package A hi Hrangchalkawn aṭanga Chhumkhum thleng niin, KM 37.420-a thui a ni a; Package B hi Chhumkhum aṭanga Tlabung thleng niin, KM 37.650-a thui a ni thung.

NH-302 kawngpui zauh leh siam ṭhat hna hi BRN Infrastructures Private Limited (BRNIPL) te'n thawkin, tun dinhmunah Package A-ah 50% leh Package B-ah 50% an zo tawh a. Kawng laih leh kawng luan bakah, lui kawr kanna tur lei dawh tur pali (major bridge 3 leh minor bridge 1) awm bawkin, lei dawh hna pawh hi thawh ṭan mek a ni.