No.1442/2021-2022

Lunglei Lockdown SOP.pdf

Lunglei the 17^th July 2021 – Covid-19 hrileng avanga inkhuahkhirhna kalpui mek chhunzawm zel dan tur leh District mipuite himna tura ruahmanna siam tulte ngaihtuah turin vawiin khan Lunglei DC Conference Hall-ah Deputy Commissioner Pu Kulothungan A kaihhruaiin meeting neih a ni. He meeting-ah hian a kaihhnawih sawrkar official-te, VC Association leh Sub Hqrs YMA hruaitute leh Lunglei commercial area VLTF-te an tel a.  Lunglei District-a COVID-19 darh zel tur venna atan 17.07.2021 zanlai dar 12 atanga 24.07.2021 zanlai dar 12:00 thleng Lunglei District Headquarter huamchhungah Total Lockdown vawiin meeting chuan a rel a ni.

Lunglei Deputy Commissioner Pu Kulothungan A chuan Covid-19 hrilengin zual lam a pan zel avangin District mipuite kan fimkhur zual a tul takzet a ni tiin mipuite himna tura tha thlah lova hmala tu VLTF-te, medical team-te, police-te, executive duty-te leh mimal tlawmngaite chungah lawmthu a sawi a. Covid-19 do kawngah District administration leh sawrkar Department te chuan theihtawp an chhuah chhunzawmzel dawn a ni tiin VLTF-te leh mawhphurna neitu dangte thawhho pui zelah a sawm a. Lunglei District in Covid-19 avangin nunna chan mi pahnih - Pu Tialhaia (90), Tawipui South leh Pi Lalnunthari (68), Serte kan nei ta chu pawi kan ti takzet a, an chhungte leh laina te kan tawrhpui takzet a ni, a ti bawk.

Lunglei CMO Dr LC Liana chuan report pe in Lunglei District-ah Covid-19 vei hmuhchhuah nitin kan pung mek zel a, nimin July ni 16, 2021-a Lunglei District-a test 592 neih atangin COVID-19 positive hmuhchhuah thar mi 52 awmin tun dinhmunah Covid -19 vei enkawl mek mi 544 an awm mek a. Kan District ina COVID-19 vei enkawlna kan neih CCC leh 4C te an khat tawh hle a, thawktute pawh an indaihlo hle thu pawh report in tun dinhmunah Serkawn Sikulpui chu mi 30 lenna tur CCC atan ruahmanna siam belh leh mek anih thu a sawi a ni.

Lunglei District-ah tun dinhmunah Dedicated COVID Health Centre (DCHC) Pukpui pakhat (khum 22), CCC pariat (8) – khum 400 capacity leh 4C sawm leh pali (14) – khum 253 capacity a awm mek a . ZMC a refer tawh a zavaiin mi 40 awmin tun dinhmunah mi 13 an awm mek a ni. July ni 1 atanga nimin July ni 16 thleng khan Lunglei District-ah test 6326 (RagT – 4298, Truenat - 2028) neih niin heng test atang hian Covid-19 positive mi 661 (RagT atangin 460, Truenat atangin 201) hmuhchhuah an ni a. July thla chhungin Lunglei District-ah Covid-19 enkawlna hmun atanga chhuak mi 308 an awm tawh bawk a ni.