Vawiin chawhnu khan Lunglei DC Pu Ashish Madhaorao More kaihhruaina hnuaiah ama office chamber-ah Lunglei District khaw 5 - Putlungasih, Zohmun, Buknuam, Dinthar leh Chawilung ‘S’ - a Bru rawn kir turte hruai haw dan tur leh heng khua an thlena enkawl zui dan tur chungchang sawiho a ni a. He meeting-ah hian a kaihhnawih department zawng zawng officials te bakah Mizoram sorkar-a OSD Home Pu David L.Thangliana pawh a tel.

Vawiin Bru lakkir chungchang meeting neihah hian Lunglei District chhunga hmalak tawh te leh mamawh tulte rel ho a ni a, Lunglei DC Pu Ashish More chuan District hotute an inpeih thawhkhat tawh thu a tarlang a ni. Bru lo kirte vil tur bik Liaison Officers 9 ruat an ni a, anni bakah Supporting Staff 8 leh Administrative Officers 5 ruat belh an ni bawk a, tul anga training pek niin, an hnathawh dan tur chungchang pawh chiang taka hrilhhriat an ni tawh tih a sawi. Lunglei Addl SP Pu Jerome Lalmuankima chuan Police lamin Bru chhungkua lo kir turte venhimna lam leh himdam taka an khua theuh an thlenna theih nan anmahni escort tur police pawh an ruahman fel vek tawh tih a sawi a. Damlohna thil thuah Medical lam pawhin an mamawh tur chu sorkarah thehluh a ni tawh tih Lunglei CMO Dr.VLMS Dawngliana chuan a tarlang bawk. Heng bakah hian Bru chhungkua leh anmahni viltu tur officer leh police te veivahna tur lirthei pawh biakfel vek a ni tawh thu leh Bru chhungkua lo kirte tana free ration card turte pawh peihfel a ni tawh tih vawiin meeting-ah hian tarlan a ni.

Tun dinhmunah chuan Lunglei District-a lo kir tur Bru chhungkua 8, tuna Khakchangpara R/Camp-a cheng mek te chu chhinchhiah a ni tawh a. Anni buaipui tur hian Lunglei District atangin officals 3 - Pu C.Lalzuiliana, SDC Lunglei; Dr. Andrew Lalremruata, ASO Revenue leh Pu Daniela Sailo ASO DC’s Office te chu tirh an ni tawh a ni.

Tarlan thin tawh angin Lunglei District-a Bru chhungkua lo kir tura beisei leh chhinchhiahte chu hetiang hi an ni :

 1). Putlungasih - 91 families

2). Zohmun - 36 families

3). Buknuam - 11 families

4). Dinthar - 81 families

5).Chawilung ‘S’ - 14 families, a zavaiin chhungkua 233 an ni.