Vawiin khan Lunglei District Level Telecom Committee chu an Chairman Lunglei DC Dr Ankita Chakravarty, IAS kaihruaiin a office-chamber-ah an thukhawm. Meeting-ah hian P&E SE Er H. Zoliana, Lunglei Additional DC Pu Benjamin Lalzama leh telecom company Service Provider hrang hrang BSNL, Airtel, Reliance Jio, Vodafone leh Idea Cellular manager te an tel.

Meeting-ah hian Lunglei District huam chhunga mobile communication leh internet service chak zawk neih theihna tura hmalak dan tur hrang hrang sawiho a ni a. Meeting kaihruaitu Dr Ankita Chakravarty chuan khawvel changkang chho zelah inbiakpawhna tha a pawimawh thu sawiin Lunglei District mipuiten mobile network leh internet chak zawk an neih theihna turin sawrkarin theihtawpin hma a la dawn a ni, a ti a. Hemi kawngah hian Service Provider kalkhawmte chu hmalak puiah a sawm a. Lunglei District khawthlang lam, a bikin Tlabung leh Bunghmun area-ah te inbiakpawhna a tha tawk thin lo chu pawi a tih thu sawiin Lunglei DC chuan Service Provider-te chu tun aia nasa zawka tan la turin a fuih a. Service Provider-te chu District huam chhunga khua an tuam zat leh khaw tam zawk tuam tura hmalak zel an tum dan ziaka theh lut turin a hrilh a. Thingtlang kilkhawr berte pawh ngai pawimawh tel turin a chah a ni.

Service Provider-te pawhin an hmalakna tlangpui leh harsatna hrang hrang an tawh te an sawi a. BSNL chuan P&E Department Optical Fibre hmangin tun thla July atang hian Lunglei District chhungah Broadband leh Mobile Internet chak zawk pe chhuak turin ruahmanna an siam mek tih an sawi. Mobile tower bun turin harsatna an tawh fo thu Service Provider-te hian sawilangin hemi kawngah District Administration kaihhruaina leh tanpuina an mamawh thu an tarlang a ni.