Nimin chawhnu khan Lunglei DC Dr Ankita Chakravarty, IAS kaihhruaiin a Office Chamber-ah May ni 17-18 a neih tur Lunglei District NLUP Kutpui (Fair cum Exhibition) atana inpuahchahna kal mek sawiho turin meeting neih a ni. He meeting ah hian NLUP Line Department hotute, District NLUP Coordinator, SDO(S), DIPRO leh SDC-te an tel.

 Dr Ankita Chakravarty chuan NLUP Kutpui chu NLUP hlawhtlinna pholanna leh tanpuina dawngtute thil tharchhuahte hralhna hun tha tak a ni tiin NLUP Line Department hotu kalkhawmte chu he Kutpui ti hlawhtling turin an theihtawp chhuah theuh turin a chah a.

 NLUP Kutpui hman dan tur relnaah hian Line Department hotuten an Department theuha inpuahchahna kal mek leh an mamawhte sawina hun an hmang a. Committee chuan NLUP Kutpui chu Convention Center Basement ah May ni 17-18 hian neih ni se tih a rel a. May ni 17 chawhma hian he Kutpui hawnna programme hi Convention Center ah neih ni se tiin Department hrang hrang official-te bakah tlawmngai pawl aiawhte, chanchinbu mite, zirlaite leh NLUP tanpuina dawngtute sawm ni se tih committee chuan a rel bawk. He Kutpui neih chhunga mamawh hrang hrang – receptionist, traffic police, security, bawlhhlawh bawm, tui in tur, first aid counter leh fire brigade-te committee hian ruahmanna fel tak a siam bawk.

 NLUP Kutpui ah hian Line Department pariat – Fisheries Department, Horticulture Department, Industries Department, Environment, Forest and Climate Change Department, Agriculture Department, AH&Vety Department, Soil and Water Conservation Department leh Sericulture Department hnuaia NLUP tanpuina dawngtute tharchhuah hralhna Stall thahnem tak buatsaih a ni dawn a. Sangha, coconut, dry chilly, pickle, thingpuife, handloom and handicraft, tailoring leh blacksmith product, artui, hmunphiah, silk, buhfai, kurtai, sial sa leh thil dangte 20% discount a zawrh a ni ang. Hemi bakah hian NLUP hlawhtlinna leh tanpuina dawngtute tharchhuahte pholanna Photo Exhibition hmuhnawm tak buatsaih a ni bawk ang. A hmunah hian Photo Booth siam a nih dawn bakah pangpar hrang hrang lei tur leh Food Stall-te buatsaih a ni bawk ang. NLUP Kutpui Organizing Committee chuan he Kut hlimawm tak chhim turin Lunglei District mipuite a tam thei ang ber kal turin a sawm a ni.