Vawiin chawhma khan Lunglei DC Conference Hall-ah Bawrhsap Pi Lalzarmawii, IAS hovin Pukpui to Haulawng kawng chhe siamthat hna kalpui dan tur chungchang sawihona meeting neih a ni a. He meeting ah hian a kaihhnawih sawrkar department hotute bakah MJA, YMA, VC Association, Lunglei District Truck Owners Association (LDTOA), Lunglei District Maxi-Cab Owners Association (LDMOA) leh Lungpuizawl khua a quarry neitu mi 17 an tel a ni. 

Pi Lalzarmawii chuan World Bank Road chu Lunglei District mai bakah Saiha District leh Lawngtlai District mipuite mamawh chawkluhna kawngpui a nih avangin a pawimawh takzet  tiin he kawng siam that hna hi uluk leh chak taka kalpui a tul a, hmalakna tichak turin thawhhona tha a pawimawh a ti. DC chuan kalkhawmte chu mipui rawngbawltu an ni tih hre nawn leh fo turin a chah a, PWD-in theihtawp chhuaha an hmalakna chu fakawm a tih thu sawiin kawng chhe siam tha tura mawhphurhna hrang hrang neitu kalkhawmte chu an hna kalhmang leh harsatna an tawh thin te an inhriatpui tawn a tul a ni, a ti a. Mipuite pawhin neitu rilru pu chunga Sawrkar hmalakna an thlawp a tul a ni tiin Pi Lalzarmawii chuan kawngpui khar chungchangah Lunglei SP-in 23rd Ocotber, 2017-a order a siam chu zawm vek turin mipuite a ngen bawk. 

He hunah hian Er C. Lalchhuana, SE PWD  Lunglei Road Division pawhin thu sawiin kawng siam tha tura an hmalakna leh hmachhawp hrang hrang te a tarlang a. Kumin financial 2017-18 hian Aizawl - Thenzawl - Lunglei road (Kanghmun 100 kmp to Lunglei AOC 164 kmp) siam nan hian Rs. 270.00 lakh dah a nih thu leh kawng siam tha tura lung tam mamawh zat  Lunglei leh a chheh vel quarry atanga an hmuh theihloh avanga harsatna an tawh thu a tarlang a. Tlawng leh Pukpui inkarah nasa takin kawng a khuar a, a siam tha tur chuan a hnawhna tur lung tam tak mamawh a ni tiin Er C. Lalchhuana chuan Lungpuizawl quarry neitute leh LDTOA-te he hmalakna ah hian thawhho puiah a sawm a. Kawng hi cement concrete-a siam tum a nih thu a tarlang bawk. 

Aizawl - Thenzawl - Lunglei Road hi World Bank sum atanga siam niin kum 2011 khan hawn a ni. A kawng thui zawng hi 164.000 km a ni a, State Highway a ni. A zau zawng hi 7.45 m a ni a, a blacktop zau zawng hi 5.50 m a ni. Tlawng Lei hi 143.750 kmp ah a awm a, Pukpui hi 155.000 kmp ah a awm. Tlawng Lei leh Pukpui inkar hi kumin chhung hian a chhiat belh nasa hle.  Kawng siam that hna hi thawh tan mek niin kawngpui hi eng motor mah tlan theihloh turin 9:00 AM atanga 5:00 PM inkarah khar a ni. 407 leh a chung lam chu Hnahthial road lamah kal vek tura ruahmanna siam a nih bakah Sumo chin hnuailam Aizawl atanga lirthei rawn kal leh Lunglei to Aizawl tlan te chu Haulawng to Dawn road ah tlan vek tur a tih an ni bawk. 

He kawng siamtha tur hian Sawrkarin nasa takin hma a la mek a, a siam nan hian Rs. 270.00 lakh dah a nih bakah Pukpuiah hot mix plant dah a ni a, chuta tang chuan heng kawng siamna tur hi theihtawp chhuah a mix te her chhuah a kawng hi siam tum a ni.