Covid-19 laka Lunglei District himna tura hmalakna kal mekte leh hmachhawpte sawiho turin vawiin khan DC Conference Hall Lunglei-ah Pu R. Vanrengpuia, District Bawrhsap/Chairman, District Level Task Force On COVID-19 kaihhruaiin Lunglei khawpui chhunga Veng 23 Village Level Task Force member-te meeting neihpui an ni. Meeting ah hian Lunglei SP Pu C. Lalthanmawia, Medical Superintendent Dr SR Ngurchamliana leh official dangte an tel a. Village Level Task Force  hmalaknate leh harsatna tawh te sawihovin hmalakna chak zawka a kal theihnan ruahmanna an siam tlang.

District Bawrhsap/Chairman, District Level Task Force On COVID-19 Pu R. Vanrengpuia chuan Lunglei District huam chhunga khua leh Veng hrang hrang Village Level Task Force leh volunteer te inpekna leh thawhrimna chu fakawm a tih thu sawiin an chungah lawmthu a sawi a. State Level Task Force on Mitigation of Coronavirus (COVID-19) 21.3.2020 tlai dar 4:30 -a Meeting in a rawt ang leh Council of Ministers-in thutlukna a siam - 22.3.2020 (Sunday) atanga ni 29.3.2020 (Sunday) thleng  Mizoram lockdown chu COVID-19 laka Mizoram mipuite kan him theihna tura ruahman a nih thu sawiin he thupek hi ngai pawimawha zawm vek turin Lunglei District mipuite a chah nawn leh a ni. Tin, Mizoram pawn atanga lo haw te pawh mipuite him tlan nan leh "The Mizoram Epidemic Diseases (COVID-19) Regulations, 2020" in a phut angin Mizoram an rawn thlen atanga ni 14 chhung chu inkhunghrang (Quarantine) ngei tur an nih thu sawiin he thupek hi zawm that a ni em tih chu VLTF-ten uluk taka finfiah turin a chah a ni. Veng hrang hrang VLTF te chu thawhhona tha tak an neih a tul thu sawiin inhriatthiam tawnna boruak tha hnuaiah tanrual a tul takzet a ni, a ti bawk.

Meeting-ah hian Village Task Force (VLTF) leh mipuite mawhphurna sawiho a ni a. Village Level Task Force (VLTF) te chu an veng/khuaa State/ram dang atanga lo haw zawng zawngte bakah lo la haw tur te pawh an hming list nei tura hriattir niin he list hi Chief Medical Officer, Lunglei hnenah thehlut tura hriattir an ni. VLTF hian inkhunghran (Home quarantine) ngaite chu an inkhunghran leh hran loh an finfiah tur a ni a, inkhunghranna chungchanga harsatna a awm emaw, inkhunghran (Home quarantine) chhunga sawiselna nei an awm chuan DLTF hotute hriattir vat tura tih an ni. Mipui mimir nitin ei leh bar (Essential commodities) lakkhawm/lei chungchang te leh Khaw hran/hmun hran atanga chakkhai lam tura Lunglei/khaw dang pan chungchang te pawh sawiho niin hengte hian Village Task Force (VLTF)-ah phalna anla hmasa tur a ni. Tui lei tur mamawhte chuan VLTF hnenah an thlen anga, tui lei leh in pek chungchang/veivahna kawnga harsatna a awm loh nan tui phur tur motor registration number chu VLTF hnenah a hriattir ang a, VLTF chuan SDPO hnenah report a pe ang. 

Mipuite tan a awlsam zawk nan Lunglei khawpui chhunga hmun laili leh dawrtu ngah zual veng pali - Chanmari, Venglai, Bazar Veng leh Electric Veng a essential commodities dawrte chu a hun inang - 11am atanga 1pm ah inhawng se tih vawiin meeting chuan a rel a. VLTF-te chu uluk leh fimkhur taka pass issue thin tura hrilh niin veng/khaw khat VLTF ina pass a pek chhuah tawh chu veng/khaw dang VLTF te chuan an veng/khua lo luh tir phal tura hriattir an ni bawk. Mipui an chhuah tamloh theihna tura ruahmanna siam turin Veng tin VLTF te hi hriattir an ni. 

Mizoram pawn atanga Lunglei District rawn lut zawng zawngte chu Mizoram an rawn thlen atanga ni 14 chhung chu an inkhunghrang ngei ngei tur a ni a. Inkhung hrang tura tih, amaherawhchu mahni ina inkhunghranna neilo te tan Quarantine Facility buatsaih mek zel niin a hnuaia tarlan te hi Lunglei District huam chhunga Quarantine Facility-te chu a ni:

1. Government High School, Chanmari, Lunglei
2. Tourist Lodge, Zotlang
3. Mizoram Polytechnic
4. SIRD-ETC, Pukpui
5. Government J Buana College
6. Govt High School Bunghmun
7. Tourist Lodge, Tlabung

Tin, Covid-19 vei emaw rinhlelh anlo awm anih chuan anmahni dah hranna tur “Isolation Ward” pawh ruahman mek zel niin Lunglei Civil Hospital-ah khum sawm (10), Christian Hospital Serkawn-ah khum pariat (8), Hope Hospital, Lunglei-ah khum pathum (3), Faith Hospital, Lunglei-ah khum pathum (3), John Williams Hospital Lunglei-ah khum pakhat (1) leh Tlabung Sub Divisional Hospital-ah khum pathum (3) awm tura ruat an ni a. Tin, Primary Health Centre tinah Isolation Ward hi buatsaih a ni bawk. 

COVID-19 chungchanga hriat chian duh nei te chuan heng number 6033151202/7629072340 leh 6009953124 ah hian zawhfiah theih a ni.