Nimin 13th July 2014 khan Gorkhali hnam thu leh hla lama sulsutute zinga a hmasa leh ropui ber Adikavi Bhanubhakt Acharya pianchampha phak vawi 200-na lawmna chu 28 Assam Rifles Hall, Lunglawn-ah hman a ni a, Lunglei DC Pu Ashsih Madhaorao More chu Khuallian niin he hun hi a hmanpui a ni. Adikavi Bhanubhakt Acharya hi Hindi lehkhabu pawimawh 'Ramayana' leh a dangte Gorkhali tawnga letlingtu a ni.

MGYA Lunglei President Pu Ram Chhetri-in he huna kalkhawm zawng zawngte lawmna thu a sawi a. Khuallian Lunglei Bawrsap Pu Ashish More chuan thu sawiin Gorkhali hnam thiltihnaah a tel vawi khatna a nih thu leh he hun hlimawm tak a hmanpui thei chu a lawmawm hle a ni, a ti. Gorkhali hnam ziarang, thu leh hla leh hnam lam hrang hrangte chu ropui a tih thu a sawi a. Mahni hnam tawng zahna chang hrelo mite chuan hnamdang tawng pawh an zahin an thiam ngai lovang, a ti bawk. Khawvelah thu leh hla ropui tak tak tawng hrang hrangin phuah a ni thin a, hengte hi mi zau zawkten an lo chhiar ve theihna turin tawng danga lehlin hi a hlawk a; entir nan, khawvela lehkhabu ropui tak 'Bible' te pawh khawvel tawng hrang hrangah lehlin a nih avangin mi tam takin a chhunga thu tha tak takte an hrethiam pha chauh a ni, a ti.

MGYA Lunglei Branch Adviser Pu Ramprasad Poudel pawhin thu sawiin hnamdang tawng thiam rualin mahni hnam tawng thiam leh humhalh a pawimawh a ni, a ti. Pu Ramprasad Poudel hi MJA Lungei Member niin Mizorama Hindi chanchinbu awmchhun 'Mizoram Udaya' Editor a ni.

Nimina Adikavi Bhanubhakt Acharya pianchampha lawmnaah hian Lunglei khawpui chhunga Mizoram Gorkha Youth Association member ten an hnam zai leh lam hmuhnawm tak tak an entir a, Lunglei Gorkha Students ten 'Ramayana' chhunga thute Gorkhali tawngin an chhamrual bawk a ni. Lunglei Bawrsap Pu Ashish More hi DIPRO Lunglei Pi Mina Zoliani-in a tawiawm a ni.

Attachment

  • Loading attachment...