No.2015/2021-2022

Aizawl the 26th August, 2021 : Vawiin khan Lunglei DC Pu Kulothungan A chuan Zobawk, Lungleia Fisheries Department hnuaia sangha chi siam chhuahna hmunpui 'Fish Seed Farm' hmalakna a hmunah kalin a enfiah.

Lunglei DFDO Pi Christina Lalramchhani leh a thawhpuiten anlo dawngsawng a ni.

Lunglei DC Pu Kulothungan A chuan Fisheries Department chu ei leh bar intodelh tura hmalakna kal mekah mawhphurna sang tak chelhtu an ni tiin kuthnathawktute hamthatna dah hmasa zel tur leh Department atanga tanpuina sem chhuah thin te pawh a dawng tur ngei te hnenah pe chhuak turin a chah a. Department thawktute hmalakna hrang hrang a hmunah ngei a hmuhpui theih chu lawmawm a tih thu sawiin an mamawh leh harsatna neihte inthlahrung lova a hnena thlen vat thin turin a chah a ni.

Fisheries Department hnuaia sangha chi siam chhuahna hmun Fish Seed Farm, Zobawk hi kum 1981 ah bultan niin a chhungah sangha dil 13 a awm a. He Fish Seed Farm ah hian nikum khan sangha tih keuna ‘Chinese Circular Hatchery’ chu cheng nuai 4.50 senga siam that niin he hatchery ah hian sangha hrang hrang chi siam chhuah (Breeding operation) hna kalpui chhoh mek niin tunah ngei pawh Fisheries Department hnathawkten riah chilhin breeding operation an kalpui mek thu DFDO Pi Christina Lalramchhani chuan a report a ni. HPC Lunglei kaltlangin helai hmun tih changtlun hna - fencing leh sangha dil tih zau kawngah pawh hmalakna a kal mek a ni. HPC Lunglei kaltlang vekin Phairuangkai khaw dai ah sangha dil lian tham tak chei that anih bakah Zawlpui khua ah Public Private Partnership (PPP) Model-in sangha dil ruahman an ni.