Vawiin chawhma khan Lunglei DC Pi Lalzarmawii, IAS chuan a pisaah HSLC Exam 2017-a Lunglei District atanga Top 10-a lang zirlai naupang 3-te hnenah lawmpuina a hlan a ni.

He lawmpuina hun Pu H. Lalrinpuia, SDO (Sadar) kaihhruai ah hian, Pi Lalzarmawii chuan zirlai naupang hlawhtling te chu thinlung taka a lawmpui thu sawiin Lunglei ti hmingtha tute an nih thu a sawi a. School Principal-te nupa leh zirtirtute’n engtiklai pawhin tha thlah miah lovin tan an la a, chutih rualin in nu leh pa te tanpuina tello chuan hlawhtlinna a awm theilo a ni, a ti. Zirlai hlawhtling te chu tuna an hlawhtlinna hi bul an tanna chauh a ni tiin, nasa lehzuala tan tir tu tur ni zawk tura a duh thu a sawi a. In tumah in chiang anga, tan in la anga, district leh kan ram ti hmingtha tu leh mi hlawhtling, midangte tanpuitu duhawm tak in nih ngei ka beisei a ni, a ti. Zirlai naupangte hnena lawmpuina certificate leh pawisa fai a hlan bakah Holy Faith School Principal Pu Lalramhluna Hrahsel hnenah lawmpuina a hlan bawk a ni.

Tun tum HSLC Exam-ah hian Top 10-ah mi 17 an lang a, Lunglei District atangin mi 3 an lang a ni. Chungte chu Vanlalvenpuia (5-na), Vanlalliani Pachuau (6-na) leh Jacob R. Lalmuanpuia (10-na) te niin, Holy Faith School zirlai naupangte vek an ni.