Vawiin chawhnu dar 1:00 khan Lunglei DC Conference Hall-ah NLUP tanpuina sum thawh hnihna Sericulture department hnuaia beneficiary 75 ten an dawng. He hunah hian Lunglei DC Pi M. Zohmingthangi IAS chu khuallian niin District Sericulture Officer Pu Lalremsiama'n programme a kaihruai a ni.
Lunglei Bawrhsap chuan thawhrimna leh taimakna hmangin sorkar tanpuina sum chu eizawnna tlakah siam turin beneficiary te chu a chah a. Pathian ringtu tan kut hnathawh chu zahawmna leh ei hmuhna kawng dik a ni, a ti. NLUP Lunglei District record a tarlan dan chuan kum 2010-2011 chhunga NLUP dawng tur a thlan 7103 atangin 6080 in 1st instalment an dawng tawh a, 2nd instalment hi Sericulture department in pe chhuak mekin Environment & Forest Department pawhin semchuah mai theih turin a ruahman mek a ni.