No.797/2021-2022

Lunglei the 3rd, June’ 2021: Vawiin chawhma khan Salem Veng Sub-Centre, Lunglei ah Pneumomia laka invenna vaccine Pneumococcal Conjugate Vaccine (PCV) chu Lunglei District tan Pu Kulothungan A, IAS, Deputy Commissioner, Lunglei chuan a tlangzarh.

Pheumonia laka invenna vaccine pek tlangzarhna inkhawm hi Dr. LC. Liana, CMO, Lunglei in kaihruaiin Pu Kulothungan A chuan India ram ah hian naupang kum 5 hnuailam ah Pneumonia hi damlohna leh thihna thlentu tam ber a ni a, sorkar hmalaknain PCV hi a thlawna dawn theih ani dawn ta chu a lawmawm takzet a ni, a ti a. Hri laka invenna hi ngaih pawimawh nachang kan hriat a tul hle ani tiin natna hrang hrang laka kan him theih nan Universal Immunisation Programme (UIP) hnuaia vaccine hrang hrang te mahni tu leh fate lak tir theuh turin District mipuite a chah a ni.

Dr. Lalrinthangi, SMO, Lunglei chuan, khawvel ram hrang hrang 146 ten PCV hi an hmang a. India ram ah hian kum tin naupang nuai 12 kum 5 tlin hmain Pneumonia avangin an thi thin a, Pneumonia (PCV) laka invenna vaccine chu UIP hnuaia natna hrang hrang laka invenna a thlawn a chi 9 sawrkarin a pek mek belchhahna tur a ni, a ti a. PCV hi dose thum a lak tur niin a vawi khatna chu naute thla 1 ½ a tlin in lak tan tur ani, thla 3 ½ a vawi hnihna lak leh tur ani , a vawithumna atan naute thla 9 a tlin hunah lak leh tur a ni a ti. India sorkar chuan kum 1985 khan Universal Immunisation Programme hi a din a, Sorkar laipui chuan he UIP hi ti lian zelin vaccine thar te pek bel zel a. He programme hmang hian Mizoram ah pawh vaccine chi hrang hrang 9 -  Tuberculosis(TB), Zenghri, Hepatitis B, Pertussis (Khuh Hip), Tetanus, Haemophilus Influenza type B, Measles leh Rubella te danna pek mek niin a chi 10 nan PCV hi vawiin atanga pek tan a ni, a ti bawk.