Vawiin chawhma khan Lunglei DC Pi Lalzarmawii, IAS chuan a pisaah Lungleia PWD hotute a kawm a, Lungsen Vehicle Owners Association leh All-NGO Coordination Committee ten Lungsen a Total bandh an huaihawt chungchanga hmalakna te a sawipui.

He hunah hian total bandh huaihawt avanga buaina leh harsatna lian tham thleng hriat a nih loh thu tarlan a ni a. October ni 21, 2016 (zirtawpni) zing dar 6:00 atanga total bandh buatsaih chu tlai dar 4:00 ah tih tawp a ni a, NH 302 siam tha tura All Vehicle Bandh chungchangah a huaihawt tute leh PWD hotute chu vawiin chawhma vek khan an in dawr a ni.

Lungsen Vehicle Owners Association leh All-NGO Coordination Committee ten All Vehicle bandh an huaihawt chu PWD hotuten an dinhmun chiang taka an sawi fiah hnu in tlai dar 4:00 khan tih tawp an remti a. November thla chhunga hna a tam thei ang ber thawh an tum thu PWD hotuten an sawi a ni.