9/2024-2025 

Lunglei; the 2nd April, 2024: Nimin khan Lunglei District  bawrhsap Pi Ramdinliani, IAS  chuan tunhnaia Paletwa township, Chin state atanga Khumi raltlan mi 85 ten Lunglei district chhunga thingtlang khaw pakhat-ah an rawn luh belh chungchangah a hmunah thil awmdan enfiah turin KHAWMAWI  khua a tlawh a. DC hi SP, Addl. DC leh YMA Sub Headquarters hruaitu ten  tawiawmin, Khawmawi VC leh YMA branch hruaituten an lo dawngsawng a ni.

Raltlan lo lut tharte kawmin,  DC chuan Raltlante chu ram dang mi an ni angin India khua leh tuiten chanvo an nei ang an nei ve theih lova, sawrkar, VC leh YMA ten inkaihhruaihna an duan te tha taka zawm turin a chah a. India sawrkarin Myanmar atanga rawn raltlante refugee angin pawm loh mahse Mizoram sawrkarin mahni mihringpuite hmangaihna rilru (humanitarian ground) avang chauhin Myanmar raltlante a lo tuamhlawm thu tarlangin, raltlante chu India sawrkar dan leh hrai te zawm tura hrilhin, ruihlo tawlh leh sualna dangah inhnamhnawih lo turin a a chah hlawm bawk. DC hian raltlante chu a bika ruahman camp-ah an awm tur a ni a, VC te hriatpuina tel loin an duh duhin an zin kual in, an pem kual tur a ni lo, a ti bawk.

Raltlante nen an inkawm zawh hnuah DC hian raltlan lo lut tharte awmna tur  in  sakna tur hmunhma a enfiah nghal a, VC hnenah raltlan lo lut tharte chenna in sakna tur silpouline bundle khat pein, tui lakna tur pipe pawh a rang lama ngaihtuahsak an ni tur thu VC te  a hrilh bawk.

Pi Ramdinliani hian MP inthlan atana hman tur Polling Station (Khawmawi Primary School) chu tlawh  nghalin,  school thuneitute chu Composite grant an dawn atanga toilet siam that tur chu a rang lama zo fel turin a chah hlawm bawk.