No.4032/2021-2022

Aizawl the 18th, February' 2022: Vawiin chawhma khan DC's Conference Hall, Lunglei ah Mizoram Youth Commission buatsaihin Skill Training for Cement Mistiri and Food Processing, Lunglei District chu hawnna hun neih niin Pu Kulothungan A, IAS, Deputy Commissioner, Lunglei chuan  a hawng.

Skill Training for Cement Mistiri and Food Processing hawnna inkhawm hi Pi C. Lalduhzuali, SDO (S), Lunglei in a kaihruaia Pu Kulothungan A, IAS, Deputy Commissioner, Lunglei chuan Mizoramah  lehkhathiam an tam a, sawrkar hna in a daih loh bakah sum dehchhuah a tam loh avangin eizawnna kawng dap a harsa a, chuvangin mahni a eizawnna  dap theihna tur sawrkarin training a buatsaihte kan hlut thiam a pawimawh a ti a. Thalaiten mahni intodelh thei tur leh an thiamna te chhawrtlak leh chhenfakawm an neih theih nan thiam thil zirtirna leh kawhhmuhna chu hmalakna pawimawh tak a nih thu a sawi a. Thalai training tur te chu sumdawnna lamah leh eizawnna  tlak a inchherchhuaka, Lunglei District tana  hmasawnna kawng kawhhmuhtu mai bakah thalai tam zawk te zirtirna pe thei khawp a zir turin a chah bawk a ni.

Pi C. Lalduhzuali chuan thuhma sawiin Covid 19 hrileng avangin  phai leh Foreign a awm Mizo thalai tam tak ten hna an chan a, hetiang anih avang hian eizawnna mumal neilo Mizo thalai tam tak an awm a ni a ti a, sorkarin eizawnna an neih leh theihna tur ngaihtuahin kawnga dap sak a North Eastern Council(NEC) atangin Livelihood Generation Programme ah sum sanction a nih thu a sawi a, Lunglei District tan pawh Cement Mistiri leh Food Processing training tura tih anih laiin nikum lamah diltu an awm mumal loh a, kuminah erawh diltu an awm tak avangin training hi kalpui thei a ni dawn ta ni, a ti.

Pu Lalmuanzuala, Centre Coordinator, MYC Lunglei chuan report pe in Lunglei District tan Cement Mistiri training tur mi 40 lak tur anih laiin mi 12 in an dil a, Food Processing ah mi 20 lak tur niin mi 8 in an dil a ti. Training hi ni 28th February 2022 atanga kalpui tan tum a nih thu leh Cement Mistiri training turte hi MYC Coaching Centre Lungleiah neihpui an ni ang a, Food Processing hi Seling Food Processing Centre ah training an nei ang. Training an neih chhung hian nitin stipend Rs 250 an dawng ang, a ti bawk.