Sawrkar Laipui Ministry of Drinking Water and Sanitation (MDWS) hnuaia India ram pum huap Thingtlang khaw fai inelna Swachh Survekshan Grameen (SSG)-2018 chu Lunglei District tana hman turin vawiin khan District Swachh Bharat Mission (G) Chairman Dr Ankita Chakravarty, IAS in a hawng. Hawnna inkhawm ah hian a kaihhnawih sawrkar department hotute bakah khawtlang hruaitute leh tlawmngaipawl aiawhte an tel.

Dr Ankita Chakravarty chuan Lunglei District mipuite thawhrimna leh inpekna zarah faina beihpui thlak Swachh Bharat Mission (SBM) chu hlawhtling taka kalpui niin faina kawngah nasa takin hma kan sawn zel a ni, a ti a. Lunglei District chu a zau hle a, heng zawng zawng ti fai tur hian mitin kan pawimawh tiin mipui rilruah faina kan tuh chuan inhrilh hriat chawp ngai lovin kan fai reng thei dawn a ni, a ti a. Faina kawngah hmalakna thar a awm zel a, hengte hi mipuiin an thlawp that a tul a ni tiin he intihsiaknaa dinhmun tha taka Lunglei District a din theih nana ruahmanna neih puiah mipuite a sawm a ni.

Vawiin hawnna inkhawm hi Er Allan Lalthalura, EE PHED Rural Watsan Division, Lunglei in kaihhruaiin Pu K. Lalhmingmawia, SDO, Rural Watsan Sub Division S in SSG inelna kalphung leh tehfung hrang hrang sawina hun a hmang a. Pu Lalmama, SDO, Rural Watsan Sub Division N in lawmthu sawina hun a hmang bawk.

Swachh Survekshan Grameen-2018 hi Swachh Bharat Mission (Gramin)   programme hnuaia thingtlang khua faina kawnga an dinhmun endik leh nihna (National ranking) pekna tur a duan a ni a. He endiknaah hian India ram State leh District fai ber leh bal berte chu tehfung hrang hrang hmanga thlan chhuah tur a ni dawn a.  He programme hi Government of India, Ministry of Drinking Water & Sanitation chuan India ram puma District 698 te tuam vek thei turin July Ni 13, 2018 khan a lo hawng tawh a ni.

Mizoram District hrang hrang endikna hna hi vawiin August Ni 1, 2018 atang hian Hindustan Thompson Pvt Ltd. atanga mithiam lo kalte chuan an nei tan dawn a, tehfung chu hetiang hian a ni ang:

1.      Khawchhung faina, mimal in, School, Anganwadi, Sakhaw hmun leh vantlang hmuna sanitation dinhmun - 30%

2.      Mipuite aw (feedback from citizens) – 35%,

3.      Online Report (Data updation as per IMIS) - 35%

Heng endikna hrang hrang atang hian State titha berte chu October Ni 2, 2018 hian lawmman pek tum a ni a. He survey hi thingtlang faina endik chungchanga hmalakna lian berte zinga mi a ni dawn a. Hemi hmang hian India rama District 698 chhunga thingtlang khaw 6800 leh Vantlang chetlakna hmun 34,900 te endik tum a ni. Tin, mihring nuai 50 chuang atangin faina kawnga an hmalakna leh ngaihdante (feedback) zawh a ni bawk dawn a ni.