Nimin khan Lunglei DC Pu Ashish Madhaorao More, IAS chuan a office chamber-ah MJA Lunglei member-te kawmin Lunglei District hmasawnna tura sorkar hmalakna hrang hrangte a sawipui.

Lunglei DC Pu Ashish More chuan kangmei venna kawngah nasa zawka tanlak a tul thu mipuite hrilhhriat leh zirtirna kawngah chanchinbumite an pawimawh thu a sawi a. Kum kalta chhung khan ram kang a tam hle a, chuvangin kuminah chuan sorkar thupek awiha March ni 15 hma ngeiin loneitu zawng zawng ten lo an hal fel vek tur a ni a, thupek palzut te lakah hremna lekkawh ngei a nih tur thu a sawi bawk. Kumina VC Inthlan neih tur chungchang pawh sawiin DC chuan Final VC Electoral Roll chu 16 February, 2015-ah tlangzarh a nih tur thu leh kumdang ang lovin kuminah chuan VC inthlan hi LAD Department ten buaipui tawh lovin DC Office hnuaia Election Department-in an khawih tawh vek tur thu a sawi a. Hemi atan hian State Election Commission chuan District tina Election Officer te chu Asst. District Election Officer-ah a ruat nghe nghe a ni, a ti.

NLUP chungchanga sawrkar ruahmannate tha taka an thlawp avang leh kumin January ni 14-a ‘Farmers’ Day’ hlawhtling taka hman a nih theih nana MJA member-te tawiawmna chungah lawmthu hrilhin Bawrhsap chuan NLUP hnuaia tanpuina sum dawngtute hmalakna vilpui tur leh a ti tha lote pawh fuih turin chanchinbumite a sawm a ni. Mi harsa zawkten leirem an rah ve theihna tura sorkar hmalakna hi a dawngtuten dik tak leh taima taka an thawh ngei theihna turin chanchinbumiten Line Department te hnathawh an hriatchiana an thlawp a tul hle a ni, a ti.

NLUP District Coordinator, Lunglei Pu Zathangliana chuan MJA Lunglei member-te kawmin ni 14 Feb, 2015 (Inrinni) khian Kanghmun, Sekhum, Haulawng leh a chhehvel khuaa NLUP hnuaia benefiaiciary-te hmalakna hrang hrangte tlawh dan tur an rel bawk a ni.

Attachment

  • Loading attachment...