No.247/2021-2022

Lunglei the 23^rd April, 2021 – Lunglei DC Office staff te hnathawh chak zawk leh langtlang taka kalpui anih theihnan leh District mipuite nena thawhhona tha tak a awm chhunzawm zel theihnan vawiin atang khan Lunglei DC Office atan Corruption Risk Assessment (CRA) bul tan a ni. CRA kengkawh tur hian Lunglei DC Office ah staff member 15 awmna Working Group din a ni.

 Corruption Risk Assessment (CRA) bul tanna puala DC Conference Hall-a meeting neihah Lunglei DC Pu Kulothungan A chuan DC Office chu District mipuite nena in ngheng hnai tak leh District-a Sawrkar Department hrang hrang hnathawh khaikhawmtu an nih avangin an hnathawh a pawimawh takzet a ni, a ti a. DC Office staff-te chu an hma zawn theuha tih tur awmte uluk leh taima taka thawk chhunzawm zel tur leh mipui hamthatna dah hmasa zel tura chahin office thlen hma kawnga tan la tur leh tul hle lovah chuan leave la lo turin a chah a. An hnathawhna kawnga harsatna an tawh te inthlahrung lova hotute hnena thlen vat thin turin a sawm bawk.

Vawiin Corruption Risk Assessment (CRA) bul tan naah hian CRA Nodal Officer Pu James Miahlung chuan zirtirna pein he hmalakna thil tum tlangpuite a sawifiah a. Corruption chu thil thleng tawh sawina a nih laiin corruption risk erawh chu engtik lai pawha thil thleng thei a ni a. Chuvangin, corruption risk ti tlem turin risk hrang hrang hmachhawn thiam theih nan risk awm thei te hnathawktuten lo hriat lawk hi thil tul a ni, a ti a. Corruption chu sum kaihhnawh lam chauh ni lovin thuneihna hman sual te, mipuite tana harsatna siam sak te leh hnathawk muang thlengin a huam a ni, a ti bawk.

Corruption Risk Assessment in a tumte :

United Nations (UN) hnuaia ruihhlo leh sualna chi hrang hrang dotu pawl pakhat, United Nations Office on Drugs and Crime (UNODC) chuan CRA in a tum te hetiang hian an tarlang :

1. Department leh organization ten an hnathawhna kawngah hlemhlet/eiruk leh thuneihna hman sual theihna lai te zawn chhuah.

2. Kalphung tha lo lai te haichhuah a, tih dik dan kawng zawn.

3. Eiruk, hlemhlet leh thil diklo (unethical practice) ven leh tih tlem.

4. Langtlang zawka mipui rawngbawlsak.

5. Mipuiin organization-ah rinna an nghah deuh deuh theih nan.

6. Organisation in service delivery tha zawka a pekchhuah theih nan.