414/2025-2026

Lunglei, 2025 Ṭau thla ni 30: Lunglei District Civil Supply Officer (DCSO) Pu Lalremruata Sailo chuan vawiin khan mipuite hnena hriattirna (circular) chhuahin, tunlai hian Mizoram hmun hrang hrangah LPG commercial cylinder hmanna tur hotel, restaurant, zirna in, biak in leh vantlang ruai buatsaihna hmunah te LPG domestic cylinder hmang an tam hle tih hriat a nih thu leh hei hi "Liquefied Petroleum Gas (Regulation of Supply and Distribution) Order 2000" leh "Marketing Discipline Guidelines, 2018"-in 'black marketing/diversion of Domestic LPG Cylinders' a tih zinga mi a nih anga dan kalh a nih thu a tar lang a.  

He thil dik lo leh dan kalha chetna hi tihtawp a nih theih nan FCS&CA Lunglei chuan hotel, restaurant, zirna in, biak in leh vantlang ruai buatsaihnaah te danin a phut angin LPG commercial cylinder chauh hmang turin a ngen tih tar langin, hun remchang hmasa berah FCS&CA, Lunglei leh Legal Metrology te nen ṭang kawpin hma lak a la nih tur thu a tar lang.