1215/2024-2025

2024 Vawkhniahzawn thla ni 18: Vawiin chawhma khan Healthy Lunglei District buatsaihin Lunglei SP Conference Hall-ah Lunglei District Executive Force (DEF) te pualin natna inkai chhawn theih loh chi chungchang inzirtirna (awareness campaign) buatsaih niin, police personnel-te chu an hriselna dinhmun endiksak an ni.

He hun hi Lunglei District Additional Superintendent of Police Pu K. Beihmotaosa chuan a kaihruai a. Lunglei SP Pu J. Lalmuankima chuan Healthy Lunglei District-in chuti ang hun an buatsaihsak chu District Police te tan thil lawmawm tak a ni tiin, Lunglei District Deputy Commissioner leh Health & Family Welfare Department te chungah lawm thu a sawi a. Kan ni tin nunphung, kan khawsakphung, kan ei leh in bakah, a ruka kan hriat loh aṭang te'n NCD hi kai theih a ni tiin, police te chu an hnaah an buai hle ṭhin avangin, mahni inenkawl uluk a ṭul lehzual tih a sawi a ni.

Pu James Miahlung, Additional Deputy Comissioner & Chairman, Sub-Committee on NCD Awareness Campaign & Screening Drive Lunglei chuan thu sawiin, Healthy Lunglei District Campaign ruahmannaa heti ang hun hi buatsaih a nih thu a sawi a. Mizoramah NCD natna hrang hrang - cancer, zunthlum, thisen sang, stroke vei kan pung chakin, thihpui pawh kan tam hle tih sawiin, ngaihven ngun a ṭul hle a ni, a ti a. Ni tin nunphungah hriselna ngaih pawimawh te, taksa inenkawl uluk leh ei leh in chungchanga fimkhur te chu NCD laka him nan a pawimawh tih a sawi.

Vawiin hun hmannaah hian Dr Vanlallawma Khiangte, MD, Lunglei Civil Hospital chuan NCD chungchang zirtirin, natna hrang hrang zingah NCD hi India ramah thihna thlentu lian ber a ni, a ti a. A tam zawk chu ruihhlo leh zuk leh hmuam tih ṭhin vang a nih thu sawiin, he'ngah hian fimkhur a ngaih thu leh ei leh in uluk a, taksa sawizawi ṭhin a pawimawh thu a sawi.

Vawiin awareness campaign buatsaihah hian Lunglei DEF mi 88 te hriselna dinhmun chu Lunglei Civil Hospital-a thawktute'n an endiksak nghal a ni.