Vawiin chawhma dar 11:30 khan Lunglei District Information & Public Relations Officer thar Pi C. Lalremruati, MIS chuan Mizoram Journalist Association, Lunglei District leh media mi te inkawmhona a neihpui. 

I&PR Conference Hall-a inkawmhonaah hian thu sawiin Pi C.Lalremruati, DIPRO chuan journalist kalkhawmte chu mipuite kaihhruaina leh zirtirna kawnga an pawimawh zia leh an mawhphurhna a san zia hre nawn leh fo turin a chah a. An thu ziah te chu belhchian dawl leh in nghahna tlak a ni tur a ni, a ti. Lunglei District-a chanchinbu miten Editorial tha tak an ziak thin chu lawmawm a tih thu sawiin hemi hmanga mipuite kaihhruai leh zirtir ngai pawimawh zel turin kalkhawmte a chah a. Lunglei District media mi ten Lunglei DIPRO hna a zawm tirha anlo dawnsawn danah lawmthu sawiin, inpawh tlang taka hna thawh ho puiah a sawm a. DIPRO office-ah tlangnel tak leh neitu rilru pu taka an mamawh te thlen thin turin a chah bawk a ni. 

Lunglei DIPRO thar chuan a hmalak tum hrang hrang te tarlangin, Lunglei District-a sawrkar department-te hnathawh zau zawka puanzar a nih theih nan ruahmanna siam mek a nih thu te, Advertisement rual khai taka sem zel a tum thu te, media mi te nen meeting a theih anga zinga neih thin tha a tih thu te leh MJA nen Press Tour neih chungchang te a sawi pui bawk a.  

He inkawmhona hunah hian media mite pawhin thu sawiin Lunglei District mi leh sa ngei DIPRO thar a lo awm chu lawmawm an tih thu an sawi a. Lunglei District chhunga media ten hma an sawn theih na atana hmalak tul an tih te DIPRO hnenah thlenin, Advertisement, Press Clipping, Press Tour leh DIPRO leh media-te mawhphurhna an sawiho a. District tana thahnemngai taka thawk ho zel turin DIPRO leh staff te an sawm bawk a ni. 

MJA Lunglei District hi kum 1972 khan Lunglei Journalist Association (LJA) tia din niin kum 2006 khan Mizoram Journalist Association ah inchhung lutin MJA Lunglei District tih an lo ni ta a. Lunglei District chhung vekah hian Mizorama MJA hnuaia Sub-Division awm chhun MJA Hnahthial Sub-Division a ding bawk a. Tun dinhmunah hian MJA Lunglei District ah member 28 awmin heng zinga mi 7-te hi MJA Hnahthial Sub-Division member an ni. 

He inkawmhona hun ah hian I&PR Department lehkhabu buatsaih Mizoram Today 2017 leh New Economic Development Policy (NEDP) hrilhfiahna lehkhabu media mite hnena semchhuah a ni bawk.