1314/2026-2027

Lunglei, 2026 Vawkhniahzawn thla ni 7: Lunglei District-a Bunghmun West Village Council (VC) leh Zotlang Local Council (LC)-ah te member boral an awm avanga State Election Commission (SEC) thu chhuak anga by-election buatsaih turah vawiin khan inthlannaa hman tur Final Electoral Roll chu Lunglei DC Conference Hall-ah tlangzarh a ni.

By-election final electoral roll tlangzarh inkhawmah hian District election official-te leh political party ai awhte an tel a. Lunglei Election Officer Pi Lalhruaitluangi chuan hun kaihruaiin, Zotlang LC tana Municipal Electoral Registration Officer (MERO) Pi TT Beikhaizi, Sub-Divisional Officer (Sadar) leh Bunghmun West VC tana Electoral Registration Officer (ERO) Pu Beitlotha Nohro, District Local Administration Officer/District Transport Officer te'n final electoral roll hi an tlangzarh.

Final electoral roll-a tar lan a nih danin, VC02008-Bunghmun West Village Council-ah hian chhungkaw 241 aṭangin vote nei mi 794 awmin, mipa 384 leh hmeichhia 410 an ni a. Draft roll-a vote nei mi 790 aṭangin final roll-ah hian voter 4-in an pung.

1/2-Zotlang Local Council-ah hian final electoral roll-ah chhungkaw 598 aṭangin voter 1,935 awmin, mipa 913 leh hmeichhia 1,022 an ni a. Draft roll-a voter awm 1,933 aṭangin final roll tihchhuahah hian vote nei 2-in an pun belh thung.

Bunghmun West VC-ah hian polling station pahnih – Bunghmun West leh Tleu te awmin, Bunghmun West-ah voter 707 leh Tleuah voter 87 an awm a. Zotlang Local Council-ah polling station pahnih bawk awmin, Zotlang-I-ah voter 997 leh Zotlang-II-ah voter 938 an awm.