No.4375/2020-2021

Nimin chawhnu khan Lunglei District Level Task Force on Covid-19 chu an Chairman Lunglei DC Pu V.Lalsangliana, IAS kaihhruaiin Lunglei DC Conference Hall-ah an thukhawm. Meeting-ah hian Lunglei District-a Covid-19 hrileng laka invenna hmalakna kal mek, dinhmun tlangpui leh hmalak tul te sawiho a ni. Meeting-ah hian Lunglei SP Pu Stephen Lalrinawma, CMO Dr Lalthlamuana leh DLTF member dangte, Sub Hqrs YMA hruaitute leh VLTF member sawm bik te an tel a ni. 

Lunglei DLTF meeting-ah hian Lunglei District-ah Covid-19 hrileng a darh zel lohna tura hmalak tul te sawiho a ni a. 

DLTF Chairman Lunglei DC Pu V.Lalsangliana chuan Covid-19 hrileng do kawngah sawrkar leh VLTF-chuan tha thlah lovin theitawp an chhuah chhunzawm zel dawn a ni tiin mipuite pawhin he hri laka invenna kawnga tih tur leh tih loh tur te fimkhur taka kan zawm zel a tul a ni, a ti a. Kan hma lawka VC Election lo awm turah pawh sawrkarin inkaihhruaina SOP a tih chhuah – Physical distancing (6 feet), mask vuah, kut sil, hand sanitizer hman, chil chhak loh tih te chu kan him tlan nan Lunglei District mipuite uluk taka zawm turin a chah a. Covid-19 hrileng mek hian engtik thleng nge a awh dawn a hriat lohva, kan hnaivai maia awm State leh ram dangah te leh Mizoramah pawh a pung zel avangin mitinte kan fimkhur lehzual a tul takzet a ni, a ti bawk. 

Lunglei District-ah Covid-19 positive hmuchhuah mi 114 awm tawhin an zinga mi 85 te chu dam chhuakin discharged an ni tawh a, tun dinhmunah mi 29 enkawl mek an ni.  

District Level Task Force, Lunglei meeting Dt.21.8.2020-a neihin a rel angin Covid-19 laka kan invenna leh himna turin a hnuaia mite hi mipui ten zawm turin kan in ngenin kan in hriattir a ni.

1. Tunhnaiah Aizawl-a veng thenkhatah Covid-19 positive hmuhchhuah thar an awm a. Heng hmun/venga Lunglei district chhung ami kal kan awm chuan mahni veng VLTF te kaltlangin contact tracing team-te hnenah in report tur a ni a. Tuna positive hmuhchhuahna veng ni lo khua/veng dangah positive hmuhchhuah thar an awm pawhin chumi hmuna kalte chuan a chunga sawi ang khian in report zel tur a ni. Contact Tracing Team-te hnena in report-na tur number-te a hnuaiah hian tarlan a ni.
6033151202/8413844758/8014754337/7760159282/8014127112

2. Mizoram Sorkar-in inkaihhruaina (SOP) a siam anga infiamna hmun, lumehna dawr, sam siamna hmun, spa, etc.-a lut leh chhuakte an hming, address leh contact number-te chhinchhiah zel tur tih a nih bakah dawr zawng zawngah dawrtu (customer) te hming, address leh contact number-te chhinchhiah vek tur a ni a, customer-ten anmahni-a ziak lovin dawrneitu-in an lo chhinchhiah zel tur a ni.

 3. Covid-19 positive te contact neih palh hlauhthawnawmna hmuna thawkte chuan a chunga in report-na tur number tarlanahte khian in report zel tur a ni.

 4. Tunlaiin khua/hmundangah covid-19 positive hmuhchhuah a nih avangin loh theih loh a nih loh chuan zin veivak lo turin mipuite kan inngen a. Positive hmuhna khuaa zin tur kan awm a nih chuan mahni awmna veng VLTF hnenah in report hmasak zel tur a ni.