4233/2024-2025

Lunglei, 2025 Ramtuk thla ni 13: Nimin, February ni 12, 2025 (Nilaini) khan Lunglei District chhunga village council (VC) 85 leh Lunglei Municipal Council (LMC) huam chhunga local council (LC) 24-ah tluang takin inthlan vote thlak zawh niin, vote tlate pawh chhiar zawh fel tawh a ni.

Lunglei District-a VC leh LC inthlanpui 2025 buatsaihah hian ballot paper hmangin zing dar 7-ah vote thlak ṭan niin, tlai dar 4 thlengin vote thlakna hun hawn a ni a. Tlai dar 4-a vote thlak zawh hman lohna hmun ṭhenkhatah chuan vote thlak hun hi pawh sei a ni bawk a. Vote thlak zawh fel hnu zan lamah, zan dar 7 aṭangin vote tlate hi returning officer (RO)-te kaihhruaiin constituency tina counting hall ṭheuhvah chhiar nghal niin, chhiar zawh a nih veleh RO-te'n result puangin, thlan tlinte hnenah thlan tlin an nihna lehkha an hlan nghal a. Inthlanna hmanrua leh lehkha pawimawh zawng zawng chin fel a nih hnuah Lunglei DC office panpui nghal zel a ni.

Lunglei District-a VC 88 leh LC 24-ah hian a duh apiangin an chuh theih general seat 360 leh hmeichhe tana hauh reserved seat 132, a zavaiin seat 492 a awm a. Inthlan chuhtu candidate zawng zawng hi mi 1,438 (general seat-ah 1,064 leh reserved seat-ah 374) niin, Bharatiya Janata Party (BJP) candidate 38; Indian National Congress (INC) candidate 341; Mizo National Front (MNF) candidate 431; Zoram People's Movement (ZPM) candidate 478 leh Independent candidate 150 an awm a ni.

58-Sailen VC-a seat 3 awmah chuhtu 3 (INC 2 leh ZPM 1) awmin, khingtu dang an awm loh avangin inthlan buatsaih ngai lo (uncontested)-a tlinga puan an ni a. 65-Sumasumi VC-ah pawh  seat 3 awmah chuhtu 3 (ZPM vek) awmin, khingtu dang an awm loh avangin inthlan buatsaih ngai lo (uncontested)-a tlinga puan an ni bawk a. Inthlan vote thlak hi nimin khan VC 85 leh LC 24-a seat 483 (general seat 354 leh reserved seat 129) atan kalpui niin, vawiinah VC 1 - Lalnutui VC-a seat 3 (general seat 2 leh reserved seat 1) atan vote thlak a ni bawk.

VC Inthlanpui 2025-ah hian Lunglei District-a VC 88-a seat 344 (general 250 leh reserved 94) awmah ZPM-in seat 146 (general 106 leh reserved 40) lain, VC 38-ah hnehna an chang a; MNF chuan seat 103 (general 74 leh reserved 29) lain, VC 18-ah hnehna an chang a; INC chuan seat 70 (general 49 leh reserved 21) lain, VC 12-ah hnehna an chang a; BJP chuan seat 2 (general 1 leh reserved 1) lain, VC siamna an nei lo va; Independent candidate-te'n seat 20 (general 18 leh reserved 2) lain, VC khata seat zatve aia tam lakna VC 1 an nei a; party mala VC din thei (majority) awm lohna VC 18 a awm bawk.

LMC huam chhunga LC Inthlanpui 2025-ah chuan LC 24-a seat 148 (general 110 leh reserved 38) awmah ZPM-in seat 60 (general 46 leh reserved 14) lain, LC 8-ah hnehna an chang a; MNF chuan seat 42 (general 28 leh reserved 14) lain, LC 7-ah hnehna an chang a; INC chuan seat 43 (general 33 leh reserved 10) lain, VC 6-ah hnehna an chang a; Independent candidate-te'n seat 3 (general vek) lain, majority neihna LC an nei lo va; party mala LC din thei (majority) awm lohna LC 3 a awm bawk.

Heti hian Lunglei District pum puiah ZPM-in seat 206 (general 152 leh reserved 54) lain, VC/LC 46-ah hnehna an chang a; MNF chuan seat 145 (general 102 leh reserved 43) lain, VC/LC 25-ah hnehna an chang a; INC chuan seat 113 (general 82 leh reserved 31) lain, VC/LC 18-ah hnehna an chang a; BJP chuan seat 2 (general 1 leh reserved 1) lain, VC/LC siamna an nei lo va; Independent candidate-te'n seat 23 (general 21 leh reserved 2) lain, VC khata seat zatve aia tam lakna VC 1 an nei a; party mala VC/LC din thei (majority) awm lohna VC/LC 21 a awm bawk.