4006/2024-2025

Lunglei, 2025 Pawlkut thla ni 29: February ni 12, 2025-a Lunglei District-a village council (VC) 88 leh Lunglei Municipal Council (LMC) huam chhunga local council (LC) 24-a inthlanpui buatsaih tur chungchangah vawiin chhun khan Lunglei District Election Officer Pi Navneet Mann chuan a hna thawh pindanah thu thar theh darhtute kawmin, inthlan buatsaih tur chungchanga thil pawimawh hrang hrang a sawipui.

Lunglei DEO Pi Navneet Mann hi Election Officer Pi R. Lalrinzuali leh District Information & Public Relations Officer Pu C. Lalhruaitluanga te'n ṭawiawmin, he hunah hian President Pu Laltlanthanga hovin District MJA member eng emaw zat an tel a. DEO chuan Lunglei District-a VC leh LC inthlan chuhtu awm dan leh inthlan inbuatsaihna hrang hrang tar langin, February ni 12, 2025 (Nilaini) zing dar 7 leh tlai dar 4 inkarah ballot paper hmanga vote thlak a nih tur thu leh hemi ni vek zan dar 7 aṭangin polling station hmuna vote chhiarna tur hmun ruahmanah vote chhiar nghal a nih tur thu a sawi a. Inthlan vote thlak nan hian general seat-ah ballot paper var (white) leh reserved seat-ah ballot paper sendang (pink) hman a nih tur thu a sawi a. Tun dinhmunah inthlan inkaihhruaina, model code of conduct (MCC) bawhchhiatna an la dawn loh thu tar langin, MCC milin dilna lutte pawh phalna pek ṭhin a nih thu a sawi a. Inthlan dik leh felfai a awm theih nan thu thar theh darhtute chu thawhpuiah a sawm nghal a ni.

Lunglei District-a VC 88-a seat 344 (general seat 250 leh hmeichhe tan bika hauh reserved seat 94) awmah chuh tuma hming pe lut 1,042 (general 771 leh reserved 271) an awm a. Endikna (scrutiny) pal tlang zo lo 2 (general leh reserved-ah 1 ve ve) awmin, inhnuk dawk (withdraw) 18 (general 14 leh reserved 4) an awm bawk a. Heti hian inthlan chuhtu (contesting candidate) chu mi 1,022 (general 756 leh reserved 266) an ni.

LMC huam chhunga LC 24-a seat 148 (general seat 110 leh reserved seat 38) awmah chuh tuma hming pe lut 420 (general 312 leh reserved 108) an awm a. Endikna pal tlang zo lo 2 (general ve ve) awmin, general seat-ah inhnuk dawk 1 a awm bawk a. Heti hian inthlan chuhtu (contesting candidate) chu mi 417 (general 309 leh reserved 108) an ni.

Lunglei District-ah hian a pum puiah seat 492 (general seat 360 leh reserved seat 132) awmin, inthlan chuhtu (contesting candidate) mi 1,439 (general 1,065 leh reserved 374) an awm a. VC-ah vote nei mi 51,731 (mipa 26,596 leh hmeichhia 25,135) awmin, LC-ah vote nei mi 41,206 (mipa 19,364 leh hmeichhia 21,842) an awm bawk a. District pum puiah vote nei mi 92,937 (mipa 45,960 leh hmeichhia 46,977) an awm a ni.

Lunglei District chhunga VC pahnihah chuan chuhtu awm chhunte chuh buaitu awm lovin tlinga puan (uncontested) an ni a. Seat 3 (general 2 leh reserved 1) awmna VC02058-Sailen-ah chuan Pu B. Hmingthanzuala (INC), Pu Lalnunsiama (ZPM) leh Pi Lalneihpuii (INC - Reserved) te chu chuhtu awm lova tlinga puan niin, seat 3 awmna vek VC02065-Sumasumi-ah chuan Pu Maya Kumar (ZPM), Pu Shanti Priyo (ZPM) leh Pi Zorami Chakma (ZPM - Reserved) te chu chuhtu awm lova tlinga puan an ni bawk a. Heti hian VC 86 leh LC 24-ah inthlan vote thlak tur a ni dawn ta a ni.