Tun hnaia Supreme Court thupek chhuah bawhzuiin Mizoram sorkar chuan Tripura Transit Camp-a awm mek Bru refugee chhungkuate Mizorama laklet dan tur chungchangah chak takin hma a lak mek a. Vawiin khan Mizoram sorkar-a Addl. Secretary, Home Pu Lalbiakzama leh OSD-cum-Under Secretary, Home Pu David H. Lalthangliana hovin Lunglei Addl. DC Pu Rothuama leh a kaihhnawih department hrang hrang hotute chu DC’s Office Chamber-ah thukhawmin Lunglei District-ah Bru chhungkua 233 laklet dan tur an sawiho.

Addl. Secretary, Home Pu Lalbiakzama chuan Supreme Court hialin Order a chhuah tak avangin uluk leh fimkhur taka Bru laklet dan tur hi tih a ngai dawn a, District lam hotute pawh a bik taka hemi thil buaipui tur officials inruat tur leh mamawh tur zawng zawng kim taka ngaihtuah hova inpuahchah turin a chah a ni. OSD-cum-Under Secretary, Home Pu David H. Lalthangliana chuan hmalak tawh chinte tarlangin Bru lakkir dan tur ruahmanna ‘Road Map-IV’ chu siam tawh niin, sum mamawh zat tur pawh sorkar laipuiah thehluh tawh a ni, a ti a. Sorkar laipui atanga sum mamawh hmuh a nih atanga lakkir hna hi thawk zawm nghal a ngaih dawn avangin tun atangin Bru kirna tur District 3 - Mamit, Kolasib leh Lunglei - te an inpuahchah tan a tul ta a ni, a ti. Ramchhungah hetianga ‘repatriation’ buaipui ngai hmun dang a awm loh avangin sorkar laipui bakah media leh human rights pawlte pawhin an ngaihven hle a, chuvangin Mizoram sorkar lam inpuahchahnaah sawisel emaw felhlelhna engmah awm lo se tih duhthusam a ni tiin district officer kalkhawmte a hrilh bawk. District 3-a Bru lakletna tur ruahmanna leh senso tur chu State Core Comittee hnenah thehluh tur a ni a, a tul ang zelin Committee chuan a ngaihtuah dawn a ni, a ti bawk.

Lunglei District huamchhunga Bru lo kir leh tura beisei chhungkaw 233 te chu heng khua 5 - Buknuam, Putlungasih, Dinthar, Zohmun leh Chawilung ‘S’- ah te an awmna tur ngaihtuahsak a ni dawn a. Bru laklet leh an chenna tur chungchangah hian District Commissioner hovin a kaihhnawih department hotute leh heng khua 5-a VC leh NGO te nen ruahmanna siam tum a ni.