Lunglei, 2026 Nikir thla ni 22: Electoral Roll en nawn runpui, Special Intensive Revision (SIR), 2026 kalpui mekah zanin tlai dar 6:00 khan Lunglei District chhunga assembly constituency paruk – 30-Lunglei North, 31-Lunglei East, 32-Lunglei West, 33-Lunglei South, 34-Thorang leh 35-West Tuipui te chuan Enumeration Form endik leh online portal-a chhut luh (digitisation) an zo fel.

Lunglei District hnuaia assembly constituency parukah hian polling station 180 awmin, vote nei mi 1,03,037 an awm a. Booth Level Officer (BLO)-te’n anmahni bial ṭheuhva voter tin hnena Enumeration Form an sem aṭangin voter 98,768 te Enumeration Form chu lak let (collect) niin, chu chu 95.86% a ni a. Voter Enumeration Form pek chhuah, chhan hrang hrang avanga lak let theih tawh loh (Uncollectable Enumeration Form), ASDD [vote neihna hmuna awm tawh lo (absent), insawn (shifted), mitthi (dead) leh awm nawn palh (duplicate)] anga chhinchhiah mi 4,269 (4.14%) an awm bawk.

30-Lunglei North-a voter 18,076 awm aṭangin EF 17,479 lak let niin, lak let theih loh 597 a awm a. 31-Lunglei East-a voter 16,489 awm aṭangin EF 15,765 lak let niin, lak let theih loh 724 a awm a. 32-Lunglei West-a voter 15,974 awm aṭangin EF 15,292 lak let niin, lak let theih loh 682 a awm a. 33-Lunglei South-a voter 19,433 awm aṭangin EF 18,684 lak let niin, lak let theih loh 749 a awm a. 34-Thorang-a voter 15,644 awm aṭangin EF 15,031 lak let niin, lak let theih loh 613 a awm a. 35-West Tuipui-a voter 17,421 awm aṭangin EF 16,517 lak let niin, lak let theih loh 904 a awm.

Lunglei District Election Officer Pi Navneet Mann chuan a hun taka Enumeration Form sem chhuah, dah khah, lak khawm leh chin fel zawh a nih theih nana thawktu zawng zawng – Election Official te, Electoral Registration Officer (ERO) leh Assistant Electoral Registration Officer (AERO) te, BLO Supervisor, BLO leh Assistant BLO te, Election Branch-a thawktute, Booth Level Agent (BLA) te, Local/Village Council, tlawmngai pawl, political party, thu thar theh darhtu leh mi lar (influencer) te bakah, District mipui zawng zawng chungah lawm thu a sawi a. SIR hlawhtling taka kalpui chhunzawm a nih theih nan mi tinte ṭawiawmna leh thawhpuina a ngen nghal bawk.