Khawvel hmun dangte rualin Lunglei-ah pawh vawiin khan ‘World Health Day’ hman a ni a, he Ni hmanna inkhawmah hian Khuallian Lungei DC Pu Ashish Madhaorao More chuan Lunglei District atan ‘Mission Indradhanush’ a hawng nghal a ni.

‘Mission Indradhanush’ hawnna inkhawm Lunglei CMO Dr.VLMS Dawngliana kaihhruaiah Khuallian Pu Ashish More chuan thu sawiin kumzabi 21-naah pawh ramchhungah mi tam tak ten an nitin mamawh pawh phuhruksak theih lova an la awm hi thil zahthlak a nih rual rualin kan zavai atan chona lian tak a tling bawk a ni, a ti. Natna hri laka invenna ‘vaccine’ chi kima pek chu nu naupai, nau pianghlim leh naupang kum 5 chin hnuai lam te chanvo dik tak a ni a, vaccine an la kim lo a nih chuan hun rawn kal zel turah rampum hriselna a tlahniam hial thei a ni, a ti bawk. DC chuan Lunglei District-a Health Worker awm zawng zawngten an hnuaia thawk ASHA Worker-te hnathawh dan ngun zawka vil turin a hrilh a, thawk tha peih lo chu bana an aiawh tur ngaihtuah hial pawh a tul mai thei a ni, a ti a. Sikul zawng zawngah an hotuten zirlai naupangte zingah vaccine la kim lo an awm leh awm lo zawng chhuakin Health Department hnathawkte hnenah report vat tur a ni ang, a ti bawk. Rampumah vaccine pek that lohna district 201 thlanchhuahah Lunglei District a tel ve chu pawi a tih thu sawiin Pu Ashish More chuan Health Department bakah media, NGO leh mipui zawng zawngte tanrual a tul a; heng ‘high focus district’ atangin Lunglei chu paihchhuah a nih vat theih nan ‘Mission Indradhanush’ hnuaia Health Deaprtment hmalaknate chu theihtawpin i thlawp theuh ang tiin kalkhawmte a sawm a ni.

Vawiin ‘World Health Day’ hmanna leh ‘Mission Indradhanush’ hawnna inkhawmah hian Lunglei District Immunisation Officer Dr. Lalparliani chuan Lunglei District chhungah natna hri venna vaccine pek tawh chin te, Immunisation chungchanga hmalakna kalpui mek te leh harsatna hrang hrang an tawh chungchang presentation a nei a. Kumin World Health Day thupui ‘Food Safety’ chungchangah Dy.Director, Food & Drugs Administration, Lunglei Pu H.Vanlalnghaka chuan presentation a nei thung a, lo atanga chaw thleng thlengin kan ei tur vawn him leh vawn thianghlim theih dan kawng hrang hrang a sawifiah a ni.

Vawiin inkhawmah hian Ministry of Health & Family Welfare atanga lo kal Dr.Tushar Mokashi, Consultant pawh a tel a, Lunglei District chhungah ‘Mission Indradhanush’ chu tha taka kalpui a nih leh nih loh endik leh vil turin Supervisor-in a awmchilh nghal dawn a ni.

Kum 2014-2015 chhunga Immunisation chungchanga Lunglei District dinhmun chu hetiang hi a ni :

1. Nau piang zawng zawng : 2539

2. Naupang kum 5 hnuailam awm zat : 15607

3. Nau pianghlim Hepatitis B vaccine pek zat : 352

4. Nau pianghlim OPV- 0 dose pek zat : 1531

5. Nau pianghlim BCG pek zat : 2791

6. Nau pianghlim sentut danna pek zat : 2181

7. Vaccine la kim lo : 21.8%

8. Vaccine la kim vek : 2119 (83.4%)

Nausen / naupang thihna thlentu natna tlanglawnte chu Pneumonia/ARI, diarrhoea, birth asphyxia, sepsis, meningitis, septicemia, fever leh birth disorder te a ni a, heng zingah hian a sang ber 21% chu pneumonia vang a ni.